नेपाली हास्यव्यङ्ग्य अनलाइन पत्रिका

चन्द्रप्रसाद न्याैपाने :

सङ्लो छ या त धमिलो नबुझी बहन्छ
मात्रै विरोध पथमा दगुरी रहन्छ
नेतृत्वनिम्ति उसको छ कहाँ भविष्य ?
बुझ्दैन के छु म स्वयम् छ कसो रहस्य ?

मात्रै प्रलाप यिनका छ कि चाहनामा
हैनन् कुनै युगविशे गुरुयोजनामा
छैनन् कुनै युवक यी गहिराइसम्म
पाएन वृद्ध मतमा म सिकूँ अचम्म

सोचाइ छैन न कतै छ बुझाइ नव्य
हिँड्दै असभ्य पथमा कुन खोज्नु सभ्य
गालीगलौजविनुको न कुनै निकास
जेन्जीहरूसँग कहाँ अब होस् विकास

सद्भाव चेत अभिभावकमा कहाँ छ
उब्जा उही छ उसरी बिउ जो जहाँ छ
चल्दैन फूल नफुली जगमा सुवास
रोपे त बीज गतिलो फल हुन्छ आस

अज्ञान किन्तु मनले सहँदैन मान
होस् योजनासहितको नमुना र सान
विज्ञान हो प्रविधिको गुणको अकास
सच्ज्ञान छैन मनमा छ कहाँ प्रकाश ?

०००
सिन्धुपाल्चाेक