नेपाली हास्यव्यङ्ग्य अनलाइन पत्रिका

हिरा भट्ट “बदमास नम्बर दुई”:

भ्याट्भ्याट्भ्याट् भटटट्ट बाइक लिई रन्किन्छ र्‍याली अहा
प्याट्प्याट्प्याट् पटटट्टपट्ट पटपट् पड्किन्छ ताली जहाँ
टाई कोट नयाँ नयाँ र महझैँ बोली असाध्यै मिठो
आमा भाषण सुन्न जान्छु अहिल्यै खाना पकाऊ छिटो
|१|

ऊ ऊ जान्छ तिमी तँ जान्छ सहितै तेरा तपाईंहरू
हामी जान्छ म जान्छु जान्छ मसितै मेरा मपाईँहरू
होलान् कार करोडका झिलिमिली बाँड्लान् फकुल्ले बिटो
आमा भाषण सुन्न जान्छु अहिल्यै खाना पकाऊ छिटो
|२|

भत्ता भाषण भात भाषण अहा भान्से हजारौं मिसी
भाले भाषणसाथ भाग थपिने जिब्रो बटार्ने सिसी
झन् आश्वासन दूधमा भकभकी पाक्ला विकासे लिटो
आमा भाषण सुन्न जान्छु अहिल्यै खाना पकाऊ छिटो
| ३|

साथी जान्छ अरे ससानु जसको हो योग्यता स्नातक
ऊभन्दा म अगाडि पुग्न नसके मिल्ला र के आमद
जाऊँ साग र दाल भात नभए खाएर निस्तै ढिँडो
आमा भाषण सुन्न जान्छु अहिल्यै खाना पकाऊ छिटो
|४|

डिग्री मास्टरको लिएँ तर पढी के पाइयो आखिर
भन्छन् भाषणसाथ साक्षरहरू दिन्छौं ठुला जागिर
बोल्ला आसनमा बसी तरुलझैँ मैले चिनेको गिठो
आमा भाषण सुन्न जान्छु अहिल्यै खाना पकाऊ छिटो ।
|५|

०००