हिरा भट्टपुराना नेता जिन्दावाद
जो गर्छन् उपचार राष्ट्रढुकुटी खर्चेर राजा बनी जो छर्छन् नि बजेट-गाँस गुलियो आफन्त आफ्ना गनी नौलो पो किन चाहियो रहिरहोस् उड्दो विकासे गति ए प्यारा जनता जिताउनुपर्यो नेता पुराना जति ।
हिरा भट्ट :
ताक्छन् बन्दुकनालबाट जसले जेन्जी युवाका शिर
जाक्छन् जो गणना गरी गरिबका सन्तान खाडीतिर
हार्ने हुन् कि भनी कनी दिन गनी बढ्दैछ चिन्ता अति
ए प्यारा जनता जिताउनुपर्यो नेता पुराना जति
।१।
भाले भाषण भाष्यले भडकले भर्छन् खुला कान जो
भ्रष्टाचार गुणस्तरीय विषको गर्छन् तुलादान जो
रोगी रोग उही र डाक्टर उही उस्तै रहून् ओखती
ए प्यारा जनता जिताउनुपर्यो नेता पुराना जति
।२।
आमाको मुटु काट्न चट्ट बलिया बन्छन् नि जो बन्चरा
जो बेच्छन् सुन-देशका नदनदी अग्ला हिमाली गरा
बारी गोरु उही रहून् मल उही उस्तै किसाने मति
ए प्यारा जनता जिताउनुपर्यो नेता पुराना जति
।३।
जो गर्छन् उपचार राष्ट्रढुकुटी खर्चेर राजा बनी
जो छर्छन् नि बजेट-गाँस गुलियो आफन्त आफ्ना गनी
नौलो पो किन चाहियो रहिरहोस् उड्दो विकासे गति
ए प्यारा जनता जिताउनुपर्यो नेता पुराना जति
।४।
तर् तर् सिन्धु सरस्वती हृदयका डुङ्गाहरूमा बसी
चिन्ने चिन्दछ चिन्नुपर्छ चिनियोस् बाङ्गो बगेको मसी
जो चिन्दैन कुरा खुरा र कुखुरा होला उसैको खती
ए प्यारा जनता हराउनुपर्यो नेता पुराना जति ।
।५।
०००
Subscribe
Login
0 Comments
Oldest
