नेपाली हास्यव्यङ्ग्य अनलाइन पत्रिका

क्या मजाले गरिबका, आज झुप्रा जलाईंदैछ
जाडो भयो ताप भन्दै, सबैलाई मनाईंदैछ ।

बुद्ध बन्ने स्वप्नदेखि, काँधमा बन्दुक बोकी हिंडे
जीत शून्य हात लाग्यो, अब कलम समाईंदैछ ।

देशमा यस्ता ठाउँ पनि छन्, भोकले अघाई सुत्नुपर्ने
राहत कहाँ पुग्थ्यो त्यहाँ, मात्र नून चटाईंदैछ ।

बुबा आमा बुढा भए, बोझ भन्दै पन्छाएर
पूजा गर्न भगवानको, तस्वीर घरमा सजाईंदैछ ।

देश खोक्रो उद्योग बन्द, पारेपछि हजुरद्वारा
युवा शक्ति पर्देशिन, आज बाध्य बनाईंदैछ ।

बुधबारे–८, झापा,
हाल– यु.ए.ई.