नेपाली हास्यव्यङ्ग्य अनलाइन पत्रिका

रातले खल्तीबाट
एक खिल्ली सिगरेट निकालेर
ओठमा च्याप्यो
कोटको दायाँ खल्ती छाम्यो
बायाँ खल्ती छाम्यो
पाइन्टका खल्तीहरू पनि छाम्यो क्रमैसँग
रातले सलाई बोक्न बिर्सेछ
नजिकै उभिएको मलाई
रातले सोध्यो– “भाइ सलाई छ ?”
मुस्कुराउँदै मैले
मुटुबाट एउटा काँटी निकालेँ
र, कोरेँ मुटुकै बट्टाको बारुदमा
आगो बल्दै बलेन
बारुद ओस्सिएको थियो सायद
सिगरेट पिउन नपाएको झोंकमा
रात फत्फताउँदै उक्लियो आकाशतिर
अझै पनि रातभर आकाशमा
सिगरेट सल्काई रहन्छ लगातार
सिगरेट त देखिँदैन यति टाढा धर्तीबाट
केवल, सिगरेटका टुप्पामा टिल्पिलाइरहेका
आगोहरू देखिन्छन्
सायद कसैको मुटुमा
आगो बाँकी हुनुपर्छ !