नेपाली हास्यव्यङ्ग्य अनलाइन पत्रिका

एउटा बिर्के टोपी छ
भित्तामा दौरा छ
भानुको नाम छ
चुँदीको धाम छ ।

च्यातिएको लेखोट छ
रित्याइएको सन्दुस छ
सुकेको मसिदानी छ
भानुको कहानी छ ।

सरकारको बजेट छ
बजेटको गेट अन्तै छ
बजेटविहीन समिति छ
तलबविहीन अफिस छ ।

हल्लाको सञ्चार छ
दुखको संसार छ
पुरस्कारको भीड छ
असारको उनन्तीस छ ।

सहरमा राजधानी छ
गाउँमा जन्मस्थल छ
राजधानीमा रमिता छ
गाउँमा मौनता छ ।

भानुको नाम छ
र पो मेरो नाम छ
संस्थाको नाम छ
टोपीको नाम छ ।

नाममा दाम छ
केही काम पनि छ
ठूलो आफ्नो नाम छ
त्यसको बेग्लै ठाम छ ।

भत्किएको मन छ
सिलाउनेको कमी छ
जलाउनेको हूल छ
जान्नेहरूको शूल छ ।

ज्ञान गाउँको छ
व्यापार सहरमा छ
सहरमा पो घर छ
गाउँमा त कहर छ ।

शिरमा बिर्के टोपी छ
भानुभक्तको नाम छ
समाजमा मान छ
को हामी समान छ ??

सातदोबाटो, ललितपुर
२०७१ असार