नेपाली हास्यव्यङ्ग्य अनलाइन पत्रिका

भुण्टी !
तिम्रो यो भट्टी पसल
र मेरो यो देशमा के फरक छ हँ ?
तिमी अलिकति दारु बेच्छ्यौ
अलिकति मुस्कान बेच्छ्यौ
अलिकति नटखट र
अलिकति आत्मियता बेच्छ्यौ ।
र मेरो देश,
अलिकति थाङ्नाहरू बेच्छ
फाटेका भोटा र कछाडहरू बेच्छ
उध्रिएका गुन्यू र उध्रिएकै सपनाहरू बेच्छ
चिरिएका कुर्कुचा र निधारका कर्कटपाताहरू बेच्छ
गालाका हड्डी र अनुहारका मुजाहरू बेच्छ
सुकेका आन्द्रा र निभेका चुलाहरू बेच्छ
बुद्ध सगरमाथा र सीताहरू बेच्छ
हो,
मैले छुट्याउनै सकिनँ भुण्टी,
तिम्रो यो भट्टी पसल
र मेरो यो देशमा के फरक छ हँ ?