नेपाली हास्यव्यङ्ग्य अनलाइन पत्रिका

के तिमीले देख्यौ ?
फेरी न्याय मरेको
लमतन्न
आङ पसारेर
खुट्टा तन्काएर
बुद्धको दुई आँखा मुन्तिर
स्वयम्भुको फेदीमा ।

निश्चय पनि
तिम्रा आँखा पुगे होलान्
र पनि देखेनौ तिमीले
कारण
न्याय अन्याय छुट्याउने
तिम्रा तराजु
आँखा छोपिएको
मूर्तिवत् मान्छेले झुण्ड्याएको
वर्र्षौं भइसक्यो ।

अदालतको कठबारमा खडा गरेर
कानुनका ठेली पल्टाएर
बहस पैरवी गर्ने
यहाँका मान्छेहरू
कालो बर्दीमा मात्र छैनन्
उनीहरूको मन पनि
उत्तिकै कालो पोतिएको छ ।

त्यसकारण
यो देशमा यसैगरी
न्याय मरिरहने छ
हरिया नोट भरिएका मगजले
वकालत गर्दैमा
कहाँ रोकिन्छ र ?

जबसम्म
डलरको आडमा
आडम्वरी भजन गाउन
र न्यायको खेती गर्नेहरूले
न्यायको सुकिलो
झण्डा फहराउन छोड्दैनन्
तबसम्म न्यायको आशमा
अनेकौँ नन्दप्रसादहरू
यसैगरी लम्पसार परिहनु पर्नेछ ।

जोरपाटी– ४, काठमाडौं