नेपाली हास्यव्यङ्ग्य अनलाइन पत्रिका

ए, मुटुकी त्यान्द्रो !
धड्कनमा बजिरहने ढ्याङ्ग्रो !

मन चाहिए मनै तिमीलाई । ज्यान चाहिए त्यो पनि जिम्मै तिमीलाई । तर प्लीज, पैसा चैने नमाग ल, सुन्दरी ! तिम्रो प्रेमीको खल्ती अझै पनि मोटाएको छैन । नपत्याए कुरो सुन न हौ सुन । :–
यो मनमा लाग्याथ्यो– हामीले ले‘राको लोकतन्त्रमा लोकवासीहरू पुनसङ्गठित होलान्, आपसी सद्भावका तुनाहरू झन् कसिँदै जालान्, हिमाल, पहाड़, तराईभरिका गरीबको दिन फिर्ला, आर्थिक प्रगतिको चप्पलमा कुर्कुच्चा फुटेका पैताला घुसार्न पाउलान् । बस् तेत्ति थियो आशा । विभिन्न आन्दोलनमा हातमा ढुङ्गा बोकेर कुदेकै हो । रनबन फालहान्दै कुद्दा फाटेको गोल्डस्टार छाप जुत्ता अझै पनि बाख्राको खोरमाथि थन्केको होला । तर समय भने यथागति कुदी नै रहँदो रहेछ ।
अनि त जिन्दगीमा अहिले मजदुर भइएको छ । परदेशमा मजदूर ! चर्को घाममा दिनैभरिजसो खटिन्छ । बेल्का थाकेर डेरामा आयो, भात खायो । सुते पनि के सुत्नु, सितिमिति निन्द्रा लाग्ने होइन क्यारे ! हाम्रो नेपालमा संविधान निर्माणको काम कस्तो चल्दै होला भन्यो । आफ्नुतिरको समाचार खोल्यो, हेर्यो । जति हेर्यो त्यति निराश । झन् हेर्यो झन् निराश । कसो–कसो आन्द्रा बटारेर आउँछ । वान्ता होला–होला जस्तो पो हुन्छ । वा..क्क– थु… ।
विदेशी हस्तक्षेप र खटन–पटन त देखि–सहीआएकै हो, अब त देशमा साम्प्रदायिक तिक्तता पो सङ्क्रमण भा’छ रे !! हैन होउ… हाम्रा टाउके नेताहरूको बुद्धिले झन् झन् किन आलु खाँदै गैरहेको छ हँ ? संविधान बनाउने कुरामा– हेर, जुँगाको लडाईं ! कस्तो आश्चर्य ? फलानोवादी र ढिस्कानोवादीको खुब प्राक्टिस चलेको देखिन्छ– देश लुट्ने ! देश ऊँभो लाग्न नदिन सत्यानाशीहरु कम्मर कसेर लागेका देखिन्छन् । तिनका चर्तिकला देखाउँदा–देखाउँदा टेलिभिजनको पर्दा समेत विरक्त हुँदो हो– खुइ….य !
स्वघोषितै सही, मैं मिस्टर लुरेप्रसाद पनि सचेत र जिम्मेवार नागरिक भैटोपलेको छु भनुम् ! आफ्नो ठाउँ र आफ्नाजनहरूलाई जरूरी मद्दत गर्न सकिएन भनेर दिनभरि मन खल्लो भैरह्यो । साँझ पनि पर्दै आयो । त्यै खल्लो पखाल्न भनेर आज साँझ एक्लै जमें– म एक्लैले साढे–तीनपेग बाठोझोल बज्जाई दिएँ । पानी हालेनछु, मोटो बुद्धि, झन् झ्याप्प भैआयो । आइएम भेरी सरी ! आज फेरि मनैभरि पिरै बोकेर सुत्न लागें । गुडनाईट, सौरपानी हिल, यु माई पुअर प्रियसी । आई मिस् यु भेरिमच एण्ड स्टिल लभ यु, डार्लिङ ।

तिम्रो आफ्नै
मनोज लाम्छाने (राजिन)
चिलाउनेघारी सौरपानी, गोरखा
हाल काम गर्ने ठाम : च्याङ्माई थाईल्यान्ड