नेपाली हास्यव्यङ्ग्य अनलाइन पत्रिका

सडक किनाराका केही चोकहरूमा
आफू बेचिइन वा आफूलाई बेच्न पर्खिरहेका
अनि कोही अरूलाई किन्न मोलतोल गरिरहेका
हुलका हुल मानिसहरूलाई देखँे !
टेवल र बाकस टाउकोमाथि अड्याएर
डमरूको पटर–पटर बजाँ बजाउँदै
महिलो पहिरनमा ‘व्यापार गर्न’ निस्किएका
‘मनुवा’ चट्पटेलाई देखेँ !
प्राडो र पजेरोमा हुइँकिँदै
सुकिलो पहिरनमा ठाँटिएर
टेलीफोनबाटै व्यापारको कुरा छिनीरहेका
‘ठूला–मानिस’लाई देखेँ
गल्ली गल्लीमा
‘ए…टुटल–फूटल ! आलु–भेन्टा !’ को
विचित्र शैलीमा उद्घोषण गर्ने
गंगाकिनारका गरिव भाइहरूलाई देखेँ !
कोही रातो र निलो प्लेट मिसिएको
चिल्ला कारहरूमा सबार भएर
‘मनुवाहरू’ माथि शासन गर्न
हिँडिरहेका ‘ठूला मानवहरू’ लाई देखेँ !
‘ब्रह्म सत्य जगत मिथ्या’को अलख जगाउँदै
देहीमा लागेरै छोड्ने
सत्य भोक मेट्नका लागि
भिक्षा माग्दै हिँड्ने जोगी बैरागीलाई देखेँ !
मोटरसाईकलमा सवार भई
आफ्ना पछाडि ल्यापटप झुण्ड्याएको
पहिल्यै आफूलाई बेची, बेचिन हिँडिरहेको
‘आफूजस्तै’ मजदुरलाई पनि देखेँ !

२३ चैत्र, २०७२
काठमाडौं