नेपाली हास्यव्यङ्ग्य अनलाइन पत्रिका

यो मान्छेको शहरमा देउताहरुको काम छैन ।
चरित्र बिक्छ पैसासँग प्रेमको कुनै दाम छैन ।।

असल कसलाई भन्ने यहाँ, यहाँ को छ बैमान ?
पूजा हुन्छ तस्करको सज्जनहरुको नाम छैन । ।

लुट्नेले लुट्यो निमुखालाई बोलिदिने को छ यहाँ ?
काम गर्ने मज्दूर किसान भुँडीभरी माम छैन ।।

कसले रोप्यो कालो रात ? प्रकाशको चाँजो बिना ।
अँध्यारोमै गयो जोवन उज्यालिने घाम छैन ।।

आशै आशमा जिजीविषा अब कति बाँच्नुहोला !
तिम्रो नामको चिठी आयो बाहिर कुनै खाम छैन ।।

सपना टुटे विदेशतिर मृत्यु रोज्यो जीवनले ।
बाँधिएर आयो कफन गाड्ने कुनै ठाम छैन ।।

यो मान्छेको शहरमा देउताहरुको काम छैन ।
चरित्र बिक्छ पैसासँग प्रेमको कुनै दाम छैन ।।