नेपाली हास्यव्यङ्ग्य अनलाइन पत्रिका

१.
नेपाल रूँदा तिमीलाई दुख्दैन भने तिमीलाई कसरी नेपाली भनौँ ?
हिमाल जल्दा तिमीलाई पोल्दैन भने तिमीलाई कसरी हिमाली भनौँ ?
ढाका टोपी र दौरा सुरूवालले मात्रै राष्ट्रियता झल्किँदैन महाशय !
पराईले माटो मिच्दा तिम्रो रगत तात्दैन भने तिमीलाई कसरी गोर्खाली भनौँ ?

२.
रूवाएर पठायौ आज तिमीले मलाई भिजाएर पठायौ
नमिलेका अनगिन्ती धर्साहरू थिए मिलाएर पठायौ
ठिकै भएछ आज तिमीलाई भेटेको, राम्रै गरेछु मैले
मन फाटेर छियाछिया भएको थियो, सिलाएर पठायौ ।

३.
जोसँग पनि धेरै बोलेर होला म हल्का भएछु
मनका कुरा सबै खोलेर होला म हल्का भएछु
यहाँ त ‘ठुलो मान्छे’ हुन गर्धन फुलाएर मैँ हुँ भन्नुपर्छ
दूधमा पानी नघोलेर होला म हल्का भएछु ।

४.
यो अन्धकारमा मैले घाम मन पराएँ त के बिराएँ ?
टोकेर हैरान पार्ने लामखुट्टे धपाएँ त के बिराएँ ?
तिमी मसँग जहिले पनि खालि सस्तो कुरामात्रै गर्छौ
सत्यको निम्ति मैले फलाम चपाएँ त के बिराएँ ?

हेटौडा, मकवानपुर