नेपाली हास्यव्यङ्ग्य अनलाइन पत्रिका

नाङ्गो खुट्टा घोटेर
बाध्यताका बाटाहरूमा
जिन्दगी नभेटेपछि
मैले जुत्ता किन्ने निर्णय गरेँ ।

नाङ्गो आङ नढाकि
नाङ्गो खुट्टा नछोपि
मेरो जिन्दगीको मुल्यभन्दा पनि महँगा
पुस्तक पढेर
मैले कुन हिमालको उचाई भेटुँला र ?
त्यसैले मैले जुत्ता किन्ने निर्णय गरेँ ।

भुइँचालोले सपनाहरू भत्केका छन्
आशाहरू धुलो धुलो भएर
बालुवाजस्तै
कनिकाले छाक टारेको धेरै भयो ।
भोको पेट बोकेर
तिम्रो भजन पढ्न असमर्थ छु
त्यसैले मैले जुत्ता किन्ने निर्णय गरेँ ।

म राहत बाँड्न जानु छ लेखकज्यू
पुनर्निर्माणमा खटिनु छ
गोर्खा सिन्धुपाल्चोकतिर
एक जोर जुत्ता लगाएर ।
छोप्नुछ पैतालाका पुराना घाउहरू
त्यसैले मैले जुत्ता किन्ने निर्णय गरेँ ।

किनेर
राख्ने ठाउँ छैन तिम्रो पुस्तक
पढ्ने फुर्सद छैन तिम्रो बिचार
अरुकै बिचारहरू पढ्दा पढ्दै
मेरा बिचारहरू मरे जस्तै भाछ ।
अब तिम्रो बिचार मैले पढ्ने हैन
मेरो बिचार तिमीले पढ्नु पर्छ ।

किनेर
खै कहाँ राखुँ तिम्रो पुस्तक
खुल्ला आकासमुनि छु
झरिले भिज्न सक्छ ।
कुच्चिन सक्छन् तिम्रा शब्दका पुलिन्दाहरू
म ढुङ्गाको सिरानी हालेर सुत्छु ।

म, मेरो स्वाभिमान भिजाएर
तिम्रो पुस्तक जोगाउन सक्दिन होला
बरु जुत्ता लगाएर
पुग्नेछु ती विकट गाउँ र बस्तिहरूमा
चेतना बोकेर
पहाड़ र कन्दराहरूमा
मलाई दुबो जोगाएर बनमारा फाँड्नु छ
त्यही जुत्ताले कुल्चिएर ।
त्यसैले मैले जुत्ता किन्ने निर्णय गरेँ ।

म नाङ्गिएको बेला
तिम्रा पुस्तकका पन्नाहरूले
लाज नढाक्ने भएर
म भोकाएको बेला
तिम्रा पुस्तकका पन्नाहरू चपाएर
भोक नमर्ने भएर नै हो
मार्फत गर्नुहोला लेखकज्यू
मैले तिम्रो पुस्तकको सट्टामा
जुत्ता किन्ने निर्णय गरेँ ।

काठमाडौं