नेपाली हास्यव्यङ्ग्य अनलाइन पत्रिका

मलाई
पृथ्वीलोक फर्कने गरि
स्वर्गलोक जानु छ
र केहि जवाफ ल्याउनु छ
बरु तिम्रो हलकारा हुन तयार छु
“ए ! यमराज मलाई स्वर्गलोक रमाना गर”

सोध्नु छ
देवता, परमेश्वर, बुद्ध र जिससहरुलाई
“धर्मको नाममा मान्छे बिभाजित किन गर्यौ”
सोध्नु छ
हिटलर, अलेक्जेण्डर र पृथ्वीनारायण शाहहरुलाई
“समर सिकायौ कि देशप्रेम”
र भन्नु छ
“रोकिएको छैन तिमीहरुले आरम्भ गरेको अभिक्रम”
र संगै
संवेदनायुक्त खबर
गर्नु छ
दुःखी शहिदहरुलाई
“तिमीहरुको रगत भुटुवामा मिलाएर खाए खौवाहरुले”

ए ! देश
देऊ एउटा निर्विकार किताब
जहाँ पढ्न सकुँ इतिहास भन्दा जेठो समय
देखाऊ एउटा सफेद शहर
जहाँ लेखिएको होस् प्रकृतीको संविधान
वा यस्तो कलम देऊ
जसमा बादल भर्न सकुँ
र आकाशलाई क्यानभास बनाएर
कोर्न सकुँ
मलाई मन पर्ने तस्बिर
जस्तै
क्षितिजमा उदाउदै गरेको घाम
केटाकेटीहरुको नयनाभिराम मुस्कान
अथवा
सगर भन्दा पनि अग्लो सगरमाथा

ए ! यमराज
ए ! देश
मत्थर पारिदेऊ यो घनचक्कर !!

भरतपुर, चितवन