नेपाली हास्यव्यङ्ग्य अनलाइन पत्रिका

फेसबुकातारम् संसार सारम्, सः चौबिस घण्टा सः सप्तः बारम् ।।
सदा चलन्तं बिग्रया र धन्दे, भबं जवानी सरम नमानि ।।
त्वमेवः लाइक् चः कमेन्ट् त्वमेवः ।
त्वमेवः च्याटं म्यासेजं त्वमेवः ।।
त्वमेवः गर्ल्फ्रेन्ड् ब्वाइफ्रेन्ड् त्वमेवः ।
त्वमेवः सर्वं फेसबुक देवः ।।

हे फेसबुकेश्वर ! हे मार्क प्रभु ! हे स्वेतकण्ठ ! हे एक सय करोड अनुयायीका मालिक !
हजुरलाई यो बालक साधुरामको तर्फबाट मिलियन मिलियन गुड्मोर्निङ छ । हजुरको वर्णन त दुई जिब्रा भएका नेपालका नेताले पनि गर्न सक्दैनन्, म जस्तो मोबाइलबाट युनिकोडमा कनिकुथी लेख्नेले कसरी सकुँला र ? जसरी ब्रह्माले कमलको फूलमा बसेर पृथ्वीको श्रृष्टि गर्नुभो त्यसैगरी मार्क प्रभुले अग्लो पिर्कामा बसेर कुखुराको फुल खाँदै फेसबुकको श्रुष्टि गर्नुभो । दक्षप्रजापतिका पनि तेत्तिस कोटि छोरी र तेत्तिस कोटि देवता गरी जम्मा छ्रसठी कोटि अनुयायी थिए भने फेसबुकपति मार्केश्वरमा एकसय कोटि नघिदै छ ।
अरु कर्मको फल अर्को जनममा मात्र पाइन्छ भने फेसबुक प्रभुको आशिर्वाद, जति लाइक र कमेन्ट चढाउँन सक्यो त्यति नै आफ्नो अर्को स्ट्याटसमा बरदान पाइन्छ । जस्ले लाइक् पुष्प र कमेन्ट अक्षता चढाउँदैन उसले लाइक र कमेन्ट पाउनु भनेको मरुभूमिमा कमलको फूल फुल्नु जस्तै हो । जसले फेसबुकेश्वरको आराधना गर्दै सभ्य लेख र प्रतिक्रिया लेख्छ उसको वालमा छिट्टै नै नवसुन्दरी युवतीको फ्रेन्ड रिक्वेस्ट आउने छ । अनि जसले अप शब्द र अभद्र व्यवहार देखाउँछ उसका भएका गर्लफ्रेन्डहरूले पनि अन्फ्रेन्ड गर्नेछन् ।
ह्याकर नामका दानवहरूले धेरै फेसबुक देवतामाथि आक्रमण पनि गर्ने गरेका छन्, तर देवताको अगाडि दानवको केही सिप चलेन । फोटो चोरेर नक्कली रुप धारण गर्ने दैत्यहरूको बिगबिगी पनि फाट्टफुट्ट चल्दैछ । यो अदना साधुरामेश्वरको पनि फोटो चोरेर यौटा दैत्यले कोमल साधुको नामबाट राज्य गर्न खोजेको थियो तर त्यो दैत्य, देवताहरूको सरापका कारण भष्म भयो । सत्य डग्दैन र झुटो टिक्दैन भन्ने कुरा आदि अनादि कालदेखि प्रमाणित हुँदै आएको छ ।
हे फेसबुकेश्वर ! तिम्रो मन्दिरमा चढाइएका लाइक र कमेन्टलाई वरिपरिका बाँदरहरू बेलाबेला लुछाचुँडी गर्न खोज्छन् । पेज नामका ठुला ठुला ढेडुले झन् जबर्जस्ती प्रसाद लुट्ने गरेका छन् भनेर पनि पुजारीले दुखेसो व्यक्त गर्दछन् । हे मार्क प्रभु ! यो ट्याग नामको राक्षसले पनि देवताहरूलाइ साह्रै दुख दिंदै आएको छ । फोटोट्याग भन्ने भूत त धामी झाँक्रीले निको हुँदो रहेछ तर स्टाटस ट्याग भन्ने कालो खटिरो पाकेर पिप ननिचोरुन्जेल केही गरे बिसेक हुँदैन, त्यसैले यो ट्यागे रोग पोलियो झैं उन्मूलन गरिदिनुहोस् । जसलाइ चाहिन्छ पाकिस्तान र सिरियाको गाउँबस्तीमा पठाइ दिनुहोस्, जहाँ पोलियोको शौकिनले आनन्द प्राप्त गर्न सक्छन् ।
हे फेसबुकेश्वर ! श्वेतकण्ठेश्वर ! मार्केश्वर ! हजुरका भक्तको भजनलाई जसले कपि गरी पेस्ट गर्छ उसको छिट्टै फेसबुक ह्याक होस्, गर्लफ्रेन्डले ब्लक गरुन्, लाइक र कमेन्टको खडेरी परोस् । जसले राम्रा राम्रा कुरा शेयर गर्छ उसका नयाँनयाँ सुन्दर, सुन्दरीका रिक्वेस्ट आउन् । लाइक र कमेन्टको वर्षा होस् । हे बुकका पनि बुक फेसबुक, अहिलेलाई बिदा पाउँ, साँझ बिहान हजुरको भजन कीर्तनमा यो मन लागिरहोस् हवस्तः यहाँलाई मेरा तर्फबाट कोटि कोटि प्रणामा छ ।

नाङ्लेभारे– ५, काठमाडौं
हाल : युएइ दुबई