नेपाली हास्यव्यङ्ग्य अनलाइन पत्रिका

उहिले नै बलि महाराजले यज्ञ गरेछन् । वामन भगवान उनका यज्ञमा गएर तीन पाइला टेक्ने ठाउँ भिक्षाका रुपमा मागेछन् । बलिले तीन पाइला दिन्छु भनी वचन दिएछन् । पहिलो पाइलो टेक्ता बलिको राज्य रहेको धर्ती नै लगेछन् । दोस्रो पाइलो टेक्ता बलिका राज्यको आकाश लगेछन् । अब तेस्रो पाइलो कहाँ टेकौँ महाराज भन्दा बलिले मेरै टाउकामा टेक भन्दिएछन् ।

बलिका राज्यका जनताले हामी कहाँ बस्नु भनेर सोध्दा तिमीहरू पाताल लोकमा जाओ भन्ने आदेश भएछ र उनका जनता पाताल गए । वामनले टाउकामा टेक्ना साथ बलि भासिएर पाताल पुगेछन् । ती पाइलाहरूको नाम के थियो थाहा भएन ।

अहिले पनि हाम्रा दानवीर बलिहरू त्यस्तै महायज्ञमा लागे । यस महायज्ञमा चाहिँ पहिले जनतालाई भोकमरीको त्रास देखाएर पाताल आदि विभिन्न लोकमा पठाइयो ।

अनि एमसीसी नामको पहिलो पाइलो नेपालका धर्तीमा टेकियो । राजसिंहासनमा बस्ने धेरै राजाहरूमध्ये कसैलाई आश र कसैलाई त्रास भएको नाटक देखाइयो । दोस्रो पाइलो एसपीपी नामको आयो । यसमा मैले बोलाएको र तैँले बोलाएको भन्ने नाटक ती राजाहरूले सुरु गरेका छन् ।

तर तेस्रो पाइलाको नाम के हुने थाहा छैन । बलि महाराजहरूको बचाउको बन्दोबस्त होला तर पाताल लोक जान नसकेका बुढाखाडा रोगीबिरामी अन्धअपाङ्ग निम्छरा निमुखा बालबच्चाहरू पो कुन लोकमा पुग्ने होलान् भन्ने खासखुस महायज्ञकै मण्डपमा चल्दै छ ।

कपन, काठमाडौं