नेपाली हास्यव्यङ्ग्य अनलाइन पत्रिका

उक्तक-१
जस्ले धेरै लुट्यो ऊसैले कुट्यो
मन र मुटु जुट्यो सजिलै फुट्यो
नाता न साता कस्यो पाता भाइ,
नक्कली नाता थ्यो सजिलै छुट्यो ।

उक्तक-२
नातालाई खाता र साता अनि किताबको गाता नसम्झ प्यारी
रगतको नाता भनेर लामखुट्टेसँग जस्तो नाता नसम्झ प्यारी
हाम्रो उडुस, उपियाँ जुम्रा किर्ना भुसुना जुकासँग नि रगतको नाता छ
नाता रगतको भन्दै आत्मियता नै नभएको नाता, नाता नसम्झ प्यारी ।

उक्तक-३
मान्छेको स्वरूप त काठमा सिप लाएर खोपे पनि निस्कन्छ
छिनु मैरी र घनले ढुंगा काठमा जतनले खोपे पनि निस्कन्छ
सास त खलाँतीले पनि फेर्छ तर के खलाँतीमा चेतना हुन्छ र ?
ढुंगाको मूर्ति, मान्छेमा चेतना पक्कै हुन्छ नखोपेमा पनि निस्कन्छ

उक्तक-४
बुढा भए बुढीलाई भर, बुढी भर गर्ने बुढा
सहारा हुन् एक अर्काका भार थाम्ने घुँडा
उमेर हुँदा तड़क भड़क उमेर ढल्केपछि,
पतिपत्नी एकअर्काका आगो ताप्ने मुढा ।

उक्तक-५
ढुम्रामा प्राण र जावीमा मासु छन्जेल न हो
पुठाको बोसो झरेपछि आफ्नै बन्छ परको
रगत मासुको शरीर जे परे नि बेहोर्ने तक्दिर,
झुपडी नै भा नि घर हो बास लाग्ने ओत हो ।

नर्थ क्यारोलाइना, अमेरिका