नेपाली हास्यव्यङ्ग्य अनलाइन पत्रिका

अमर अधिकारी :

(ट्रयाकसुट किनेर ल्याएपछि)
भाइः मैले त ATOM ट्रयाकसुट किनेको, ह्याँ त MOTA पो देखिन्छ दाइ !

दाइः अक्षर ऐनामा हेर्ने हैन नि त, उल्टो देखिहाल्छ नि !
१

(टोलमा साथीको घर खोज्दै)
आगन्तुकः यो टोलमा बिरालोको घर कुन होला ?

पसलेः खोई यो टोलमा त्यस्तो नाम गरेको कोही भए जस्तो लाग्दैन।

आगन्तुकः उहाँको पूरा नाम बिर्ख राम लोहार हो के, हतार भएर मैले त सटकटमा भनेको।
२

(घरमा चोरी भएको भोलिपल्ट)
पहिलो छिमेकीः त्यत्रो चोरी हुँदा पनि चोरलाई मर्न नसकेको चोर नभनेर किन बाँच्न नसकेको चोर भन्नुभाको ?

दोस्रो छिमेकीः अस्तिको महायज्ञमा वाचकले सकारात्मक सोच्नुपर्छ, नकारात्मक बोल्नुहुन्न भन्नुभएकोले।
३

(औषधि खानेमा प्रतिस्पर्धा)
निर्मलाः थाहा छ? मैले त सुगरको औषधि खानेथालेँ नि !

उर्मिलाः धेरै धाक नलगाऊ ! मैले त झन सुगर मात्र होइन, प्रेसरको समेत औषधि खानथालेको धेरै भैसक्यो।
४

(विवाह भएको केही दिनपछि)
नारायणः छोरीको बिहे लेखापालसँग भएपछि झन चिन्तित पो हुनुहुन्छ गुरु, किन हो ?

हरिः लेखापाल केटा भेटाएँ भनेर ज्वाइँ बनाइयो, ज्वाइँ त ट्वाइलेट बाहिर बसेर पाँच/दश रुपियाँ उठाउने लेखापाल पाे परेछन् भन्या।

नारायणः के भो त ? तिनी के मान्छे होइनन् र ? यस्तै सोचले त देश बिग्रेको।
५

०००
खुंग्री, रोल्पा। हालः बुढानिलकण्ठ, काठमाडौँ।