नेपाली हास्यव्यङ्ग्य अनलाइन पत्रिका

अमर अधिकारी :

भ्रष्टहरू घिउ खाने इमानदारले पानी
छट्टुहरू मान पाउने इमानदारलाई हानी

चम्चागिरी जान्नेलाई नेपालमा ठाउँ छ
सोझा स्थान छैन चोरहरूकै नाउँ छ

बदमासहरू सल्बलाउँछन् चुक्ली पनि लाउँछन्
हाकिमको अघि गई उनकै गुणगान गाउँछन्

मालदार अड्डा ताक्छन् घुस्याहा कर्मचारी
इमानदार राष्ट्रसेवक बन्छन् ब्रह्मचारी

घुसको मुठा घरमा ल्याई बुढीलाई दिन्छन्
सुपरमार्केट गएर महँगा वस्तु किन्छन्

घुस्याहाले इमानदारलाई किन पो गन्थे
बेइमानले देशै खाए बाउ बाजेले भन्थे

घुस्याहकी श्रीमतीका धेरै धेरै गहना
इमानदारको कहिल्यै हुन्न सुखी हुने चाहना

०००
बुढानीलकण्ठ, काठमाडौं