नेपाली हास्यव्यङ्ग्य अनलाइन पत्रिका

१.
आधा पेट खाइन्छ
एकसरो लाइन्छ
यहाँका हरेक काउण्टरमा
गरिबी साट्न पाइन्छ ।

२.
अम्बाको बोटमा स्याउ फुलेछ
सहरले आफ्नो बाटोनै भुलेछ
त्यो पल्लो पसलमा त लौ
‘टेक् अवे शप’ पो खुलेछ ।

३.
वटवृक्ष रोपेँ विषवृक्ष सरेछ
सुकेर पात जति भुइँमा झरेछ
सल्काउन आगो बटुलेर राखें
रातभर मुसलधारे पानी परेछ ।

४.
लोडसेडिङ् हुनै पर्छ
हुनै पर्छ ! हुनै पर्छ !!
नारा लाए उसले,जसले
अँध्यारोमा छलछाम गर्छ ।

४.
गोरे र रात्माटे होलान्
खुब गफ छाँटे होलान्
असाध्य घाँटी खस्खसायो
मेरै कुरा न काटे होलान् ।

५.
जुका भए टाँसिन्छ रगत खान्छ
तितो पदार्थ लगाए सजिलै जान्छ
लौन यो त के टाँसियो के ?
न भनेको मान्छ न धोएर जान्छ ।

६.
पुगिसरी आँउदा केही चाहिएन
पहिले खाउ खाउ भन्दा पनि खाइएन
अहिले त त्यही मन्त्री पद साह्रै महङ्गो भयो
दरखास्त दिंदा पनि पाइएन ।

पोखरा १०, हाल संयुक्त राज्य अमेरिका