नेपाली हास्यव्यङ्ग्य अनलाइन पत्रिका

१.
एकदुई हजार हल्लाएर कार्यकर्ता पालेका छौ
नायक बन्ने दौडमा आफ्नो मर्यादा फालेका छौ
स्वार्थ ग्रन्थी चुहाएर धुन्धुकारी भइसक्यौ तिमी
अँध्यारोमा सिकार खोज्न आफ्नै घर बालेका छौ ।

२.
खोल्साको तुईन हटेन डाँडामा भ्यूटावर ठडेको छ
पदयात्राको नाममा हजुर केवलकार चढेको छ
यो परिवर्तन कस्तो खाले सोच्दा सोच्दै दिक्क छु
अर्थतन्त्र टाट पल्टिएर उत्तानो परि लडेको छ ।

३.
चुहिने भाँडोमा छ सिद्धान्त चुहिँदैन भन्छन् ऊ आफैं
कोचाकोच छ एजेण्डा फेरि कुहिँदैन भन्छन् ऊ आफैं
भन्नुस् त पत्याउनु कि नपत्याउनु कस्तो ठूलो दुविधा .?
विकासको गर्भमा लात हानि तुहिँदैन भन्छन् ऊ आफैं ।

भरतपुर, चितवन