नेपाली हास्यव्यङ्ग्य अनलाइन पत्रिका

एक
राम्रा राम्रा गजल उहिले पनि फुर्थ्यो हजुर
तर बाचन गर्ने अबसर बिरलै जुर्थ्यो हजुर
न त थियो फेसबुक न त थियो टिकटक
मात्रै खोला नाला र पहराले सुन्थ्यो हजुर ।

दुई
हिजो पार्कमा भेट्दा तिम्ले मलाई हाइ भन्यौ
छुट्ने बेला फेरि हात हल्लाएर बाइबाइ भन्यौ
बिताइदिए मैले पनि पुरै रात तिम्रै सम्झनामा
मनै खिसिक्क भो जब आज के छ दाइ भन्यौ ।

तीन
आहा कति राम्री तिमी मोरी झुम्के बुलाकीले
अरे यो मन मेरो लग्यो चोरी झुम्के बुलाकीले
तिमीलाई देखे पछि खै के भो के भो आजकल
नजर मेरो उतै अड्क्यो गोरी झुम्के बुलाकीले ।

चार
डल्ले साहुको घरै छेउमा डेरा सर्छु भन्यौ उतिबेला
त्यसकै कान्छो छोरासँग बिहे गर्छु भन्यौ उतिबेला
अब अहिले पछुताएर के गर्छौ र मैयाँ भन आफै
त्योसँग बिहे गर्न नपाए म त मर्छु भन्यौ उतिबेला ।

फ्लोरिडा, अमेरिका