नेपाली हास्यव्यङ्ग्य अनलाइन पत्रिका

नवराज न्यौपाने ‘मौन’

१.
नियम कानुन बराबर हो, दायाँबायाँ मोड्नु हुन्न
सङ्कल्प र वाचा कसम कसैगरी तोड्नु हुन्न
भ्रष्टाचारले जरा गाड्दा अर्थतन्त्र थला पर्‍यो
नियम मिच्ने भ्रष्ट मान्छे जो भए नि छोड्नु हुन्न ।

२.
कालो पनि सेतो बन्छ पैसा धेरै पोखेपछि
काम फत्ते हुँदै जान्छ पाउ मल्दै ढोगेपछि
लुकेको छ कालो पाटो देखिने त अर्को भयो
सुरिएर बढ्छ नेता सबले ताली ठोकेपछि ।

३.

पापको गुरु लोभ हो रे सबैजना फँस्दा रैछन्
ठाउँ मिले भाउ मिल्छ, दैव दाहिना बस्दा रैछन्
देशको चिन्ता छैन कत्ति, आफ्नै भुँडी भर्न खोजे
खान बाँकी छैन केही, अझै कम्मर कस्दा रैछन् ।

०००
मातातीर्थ, काठमाडौं