नेपाली हास्यव्यङ्ग्य अनलाइन पत्रिका

भोजराज रेग्मी मुखाले :

१)
नपाउनेले केरा पाउँदा बोक्रैसमेत खाएछ
लाटालाई भेटेर गाँडोले गफ लडाएछ ।
प्रतिभा र प्रगतिको कति बखान गर्नु ?
बोर्डिङ्ग पढ्न गको छोरो बेहुली लिई आएछ ।

२)
काजी खुइलिएर पाजी भए,
पाजी मौलाएर काजी भए
माझीहरू बाटो लागे
बटुवाहरू माझी भए
समयको मर्जीभन्दा अर्को ठूलो हुकुम छैन
हुँदैहुन्न भन्ने आज बिना शर्त राजी भए ।

३)
हो, उसले आँखा सन्काउँदा सिंहदरबार चल्छ
हो, उसैले आँखा झिम्क्याउँदा घरबार चल्छ ।
हुँदाखानेको अकाल र अनिकालसम्म पुग्नै पर्दैन
हुनेखानेको हाच्छ्युँ छापेर पनि अखबार चल्छ ।

०००
पेप्सीकोला, काठमाडौं