नेपाली हास्यव्यङ्ग्य अनलाइन पत्रिका

खगेन्द्र नेउपाने :

१.
यति धेरै व्यङ्ग्य लेख्यौ कहिले च्वास्स छुन्छ हजुर !
भ्रष्टाचार र महङ्गीले जनता सधैँ रुन्छ हजुर !
अपमान र गाली मात्रै राजनीतिको लक्ष भए
यो देशमा नेता बन्न नाङ्गै हिँडे हुन्छ हजुर !

२.
मन्त्री बनेपछि ट्वाक्कै कमिसनको बन्नुहुन्छ
छोरीज्वाइँ सालाजेठान पहिलो नम्बर् गन्नुहुन्छ
फुकाल्नुहोस् जर्सी धेरै पुरानु भो गह्नाइसक्यो
किन अझै आफूलाई क्रान्तिकारी भन्नुहुन्छ ?

३.
आज पनि कुकुर र बिरालाको मेल भयो
सत्ता प्राप्ति पद र पैसा बाँडीखाने खेल भयो
हत्यारा र अपराधी सम्मान सहित मुक्त हुँदा
देशलाई चिनाउने खेलाडीलाई जेल भयो ।

००००
गौरादह, झापा