बा आमा एवं जेष्ठ नागरिक
पुराना सोचले दिन्छन्, आधार ज्ञान शिल्पका । बुढा पाका खुला हुन्छन्, दया माया विचारका ॥ नयाँ हुन्छन् खुबै काँचा, रङ्ग ढङ्ग प्रकारका । पाकाहरू मियो बन्छन्, देव देवी समानका ॥
के.पी.पौडेल :
समग्र बुद्धि रोप्दिने, छ श्रेष्ठ भाव जेष्ठमा ।
सहस्र शिल्प भर्दिने, विचार हुन्छ बृद्धमा ॥
विकार रोक्न तम्सिने, छ उच्च शक्ति बृद्धमा ।
दशा र कष्ट छेक्दिने, विकल्प हुन्छ जेष्ठमा ॥-१
यहाँ बृद्ध बृद्धा, उज्याला भला हुन् ।
कला तेज भर्ने, अनौठा सिरा हुन् ॥
सबै बृद्ध बृद्धा, पुजौँ उच्च ठानी ।
सुनौलो र उम्दा, बनोस् जिन्दगानी ॥-२
पाका मानिस बृद्ध बा हजुरबा, खोज्छन् सहारा लिन ।
आफ्नै प्राण हियो फियो पनि कतै, छोड्लान् कि टेवा दिन ॥
बृद्धा बृद्ध सबै खुबै पिडित छन्, हेरून् तमासा हरि !
सारा सन्तति भावना पर हुँदा, रुन्छन् बिलौना गरी ॥-३
बृद्ध बा मातृका, साथमा बस्छ को ?।
जेष्ठका रुग्णका, वेदना सुन्छ को ? ॥
जीणर्का देहका, दुर्दशा मेट्छ को ?।
जेष्ठका त्यागका, शृङ्खला पढ्छ को ?॥-४
छोरा बुहारी, वनिता कता छन् ।
माता पिताका, दुखका कथा छन् ॥
छन् इष्ट साथी, सब छन् धरामा ।
पिता र माता, तर छन् व्यथामा ॥- ५
पाका मान्छे घर मुलुकका, शक्तिका मूल बन्छन् ।
राम्रा उम्दा अनुभवहरू, युक्ति सल्लाह दिन्छन् ॥
आफ्ना प्यारा जनन सबमा, शिल्पका भाव छर्छन् ।
भोको नाङ्गो विवशपनमा, लालका पेट भर्छन् ॥-६
छन् जेष्ठका विगतका, अति नम्य कर्म ।
जोगाउनै कठिन भो, नबुझेर मर्म ॥
बृदा र बृद्ध जनका, शुभ साधना छन् ।
माया दया सुजनता, उपदेश दिन्छन् ॥-७
पुराना सोचले दिन्छन्, आधार ज्ञान शिल्पका ।
बुढा पाका खुला हुन्छन्, दया माया विचारका ॥
नयाँ हुन्छन् खुबै काँचा, रङ्ग ढङ्ग प्रकारका ।
पाकाहरू मियो बन्छन्, देव देवी समानका ॥-८
लोकले पुज्ने ईशको रूप देखिन्न खोजेर ।
घरका देव पुज्दैनन् मान्छे हिँड्दछन् कुल्चेर ॥
गरौँ है माया बाबा र माता माथ हुन् ती हाम्रा ।
आँखाले देद्ने हातले भेट्ने ईश हुन् ती राम्रा ॥-९
०००
बट्टार, नुवाकोट
हालः बालाजु, काठमाडौं ।