नेपाली हास्यव्यङ्ग्य अनलाइन पत्रिका

आमा पुजेर बस्ने छोरा महान् हुनेछन्
सामर्थ्यका पुजारी नक्षत्र नै छुनेछन्
लागे धुलो र मैलो खुर्केर पो धुनेछन्
टारेर विघ्न बाधा सम्पूर्ण नै फुनेछन्॥१

यो देह भन्नु हाम्रो हो प्रेमको निसानी
आमासँगै खुलेको हो सृष्टिको बिहानी
सन्तानको खुसीमा जोडिन्छ जिन्दगानी
आमा विना कसैको लेखिन्न हो कहानी॥२

सन्तानको उपेक्षा खप्दै ठुलो दशामा
आमा कतै नरोउन् पीडा र वेदनामा
छोडेर पुत्र लाठे टाढा नहुन् रमाना
लागुन् समस्त छोरा पूजा र अर्चनामा॥३

मिल्दैन स्वर्गमा नै आमा र जन्म धर्ती
सम्पूर्ण लोकलाई श्रीरामको छ अर्ती
जे भन्छ सभ्य स्रष्टा जाँदैन बात जर्ती
होउन् सबै सुसारे आजै भएर भर्ती॥४

हाँसुन् मुमा र धर्ती पाएर सान भारी
भर्दै जुहार लाखौँ सन्तानले सिँगारी
यो देशभित्र होओस् सत्कर्म मात्र जारी
छोरा नहुन् कसैका गद्दार धुन्धुकारी॥५

०००
भक्तपुर