नेपाली हास्यव्यङ्ग्य अनलाइन पत्रिका

मैले यस्तो रूप र चरित्रको त कल्पना पनि गरेको थिइन । कसरी यति धेरै कुरूप र विरूप भए मान्छेहरू ?

पृथ्वीलोक निवासी मान्छेहरूको बदलिंदो रूप र चरित्र देखेर ब्रह्माजी अचम्म मान्दै नारदजीलाई बोलाएर तुरुन्तै आदेश दिए,
‘हे नारद! भूलोक गएर एउटा यस्तो मान्छेलाई खोजेर लिएर आऊ जो स्वार्थी, बैगुनी, धूर्त, कुटिल केही नभएको होस् ।’

– हस् प्रभु !

आज्ञा शिरोपर गर्दै नारदमुनि पृथ्वी लोक हानिए ।

चारैतिर चाहारे। देवदेवालय, अड्डा, अखडा, मन्त्रालय, न्यायालय सबैतिर धाए। जताततै धूर्त, चोर र फटाहाहरू मात्र भेटे ।

प्रत्येक मनुवाको मन, मुटु र नाडी छामे। सबै बैगुनी, स्वार्थी र कठोर मात्रै देखे। एउटा पनि गुण भएको मान्छे भेट्न सकेनन् र निराश भएर पृथ्वी लोकबाट फर्किए ।

ब्रह्माजीले नारद मुनिलाई निराश देखेर सोधे, ‘खै त नारद मान्छे ?’

-कोही छैन प्रभु! हजुरले बनाउनुभएको मान्छेमा त खोटै खोट मात्र रहेछ । एउटै पनि गुण रहेन छ !

नारद मुनिले पृथ्वी लोकबाट बोकेर लगेको मानवरूपी एउटा आकृति अगाडि सार्दै भने,‘ल लिनुस् यो यन्त्र मानव । मान्छेले बनाएको यो मान्छेभित्र ती बैगुनहरू छैनन् प्रभु !’

०००
हेटौंडा-४, मकवानपुर