साइबर अपराध सम्बन्धी सचेतना सामग्री

झोलेवाद जिन्दावाद

बेलैमा झोले बनौँ । आफू बन्न आफ्नैलाई दबाउनु पर्छ । शत्रुको पाउ समाउनु पर्छ । गर्नु पर्नेलाई चाकरी गरौँ । चतुर्‍याइँका साथ चम्चागिरि गरौँ । देशमा झोलेतन्त्र आएको छ । झोलेवाद झाङ्गिएको छ । झोलेतन्त्रलाई संस्थागत गरौँ ।

Nepal Telecom ad

रामप्रसाद पन्थी :

भाग्यले सबै कुरामा सबैलाई साथ दिँदैन । धेरैको नामसँग केके कुरामा तालमेल मिलेको देखिँदैन । उदाहरणका लागि केही साथीहरूको नाम लिनै पर्ने हुन्छ ।

दानबहादुरले दानका नाममा कहिँ कतै सुको चढाएको रेकर्ड छैन । बलबहादुरको शरीर सुकेनासले सुकेर सुइरो जस्तै भएको छ । धनबहादुर सडकमा भिख माग्दै हिँड्छन् । दयाकुमारीले अस्ति भर्खर सासुलाई भुत्ल्याएको खबर पत्रिकामा नै छापिएको थियो । कसैको नामलाई लिएर मजाक गर्न खोजेको होइन् । नामले कतै बदनाम गराएको छ कि ? भन्न मात्रै खोजेको हो । कहिलेकाहिँ त्यस्तो संयोग पर्न जान्छ । अन्यथा भएमा अन्यथा नलिनु होला ।

अरुका कुरा काट्नु मेरो रुचिको विषय होइन । अरुको प्रचारबाजी गरेर केही फाइदा पनि छैन । मेरो मान्यता आफू आफ्नै परिचयबाट अगाडि बढ्नु पर्छ भन्ने हो । मलाई आफ्नो नामप्रति गर्व छ । नाम जुराइदिने गुरूप्रति उच्च सम्मान छ । नामका साथ परिचय दिन र परिचितबाट नामले पुकारिदा मलाई आनन्द आउँछ । यस्तो सौभाग्य कमैलाई मिल्दछ । मेरा एकजना साथी छन् ढालबहादुर । उनले कैयौँपटक न्वारन गराउनेलाई सराप्ने गरेका छन् । नाम परिवर्तनको लागि चक्कर चालेका पनि रहेछन् । तर सारा यत्न बालुवामा पानी खनाएझैँ भएछ ।

अब गरौँ आफ्नै कुरा । आफ्नै परिचयबाट भलाकुसारी गरौँ । मेरो खास नाम झोलाराम । यसबाट थुप्रै उपनामहरू पनि उत्पत्ति भएका छन् । मलाई राम्रैसँग थाहा छ । यसमा कुनै विमति वा आपत्ति छैन । चलचल्तीका उपनामहरू मै बताइदिन्छु । पकेट डायरीमा टिपेर राख्दा राम्रो । बिर्सन सकिन्छ । परिचयात्मक कार्यक्रममा पुकारिएका धेरैजसो नामहरू याद हुँदैनन् । स्मरण शक्ति राम्रो भएकाहरूले सम्झन सक्छन् । आफू त परियो विस्मरण शक्ति राम्रो भएको मान्छे ।

माफ गर्नुहोला । कुरै कुरामा उपनामको कुरा बिर्सिएछ । माया गर्नेहरूले मलाई झोले, झले, झोलु, झल्लु आदि अनेक उपनामहरूबाट सम्बोधन गर्दछन् । झोलाराम आफैलाई लामो लाग्छ ।

मलाई केटाकेटी देखि नै झोला ओैधी मन पर्ने । स्कुल नजादैबाट झोला भनेपछि मरिहत्ते गर्ने । घरमा कोही पाहुना आयो भने झोला कोट्याइहाल्नु पर्ने । मिठाइँको लोभले झोला कोट्याउँदा पैसा फेला परेपछि झोलाप्रेम अझै बढेर गएको हो ।

स्कुले जीवन त झोले भैहाल्यो । झोला नबोकी स्कुल गए मास्टरजीले टाउकोमा आलु उमारिदिनुहुन्यो । पछि आफै मास्टर भइयो । पाठ्य सामग्री बोक्न झोला नभई भएन । त्यसैले झोलाले छोडेन ।

मास्टरले एकोहोरो मास्टरी गरेर पुग्दो रहेनछ । सरूवा बढुवाका लागि नेता चाहिँदा रहेछन् । राजनीतिमा लाग्ने प्रारम्भिक जग पनि मास्टरी हो भन्ने कुरा मैले बताइरहनु पर्दैन । वडादेखि संसदसम्मका जनप्रतिनिधि हेरे पुग्छ । जेहोस् मास्टरी गर्दा गर्दै नेताजीहरूसँग पनि साँठगाँठ बढ्न थाल्यो । पेशागत संघ संगठनको फेरो समातेर नेताजीकै इसारामा राजनीतिका काम गरियो । चुनावी माहोलमा झोलामा पर्चा, पम्पलेट र पैसा खाँदेर हिँडियो । कतिपयले झोले मास्टरको आरोप लगाए । कतिपय साथीहरू खण्डनमा पनि उत्रिए । मलाई भने केही फरक परेको थिएन । पेशाले मास्टर म नामले झोलाराम । सबैले लुकुछिपी भन्ने गरेको झोले मास्टर ।

झोला बोकेकै आधारमा म झोले मास्टर भन्ने ठान्नुुभयो भने तपाईंले मलाई अझै बुझ्नु भएको छैन । मेरो नाता झोल पदार्थसँग पनि जोडिएको छ । झोलको संगतले झल्लिन थालेपछि म टोलमा झल्लुरामका रूपमा परिचित छु ।
मास्टरलाई मात्रै झोले भन्दा अरु पेशा वा व्यवसायमा लागेका साथीहरूको चित्त दुख्न सक्छ । यस्तो चित्त दुखाइ हुनु स्वभाविक छ । यहाँ को मात्रै छैन झोले ? सेना, प्रहरी, कर्मचारी, व्यापारी, पत्रकार, वकिल राजनीतिज्ञ… ! सबैमा कुनै न कुनै प्रकारको झोलेपन छ । अरूले झोलेका रूपमा परिचित हुन खोज्दैनन् । मैले सबै कुरा खुलस्त पारिदिएँ ।
झोलेपन हाम्रो विशेषता हो । प्राचीनकालदेखि कुनै न कुनै रूपमा झोलेवादी दर्शन चल्दै आएको छ । देशमा संघीयतासँगै आएको गणतन्त्रले झोलेवादलाई संस्थागत गरेको छ । गणतन्त्रलाई झोलेतन्त्र भन्दा फरक नपर्ला ! त्यसैले म त भन्छु –
झोलेतन्त्र झाङ्गिएर झलमल बनोस्
सारा जन मन मुटु झोलेवाद भनोस् ।

झोले बिना खोले कान्छो टोले नेता हुन्न
बनेपछि ठूलो नेता थाल्छ जाली बुन्न ।

झोले हुनु भनेको कुनै नराम्रो विषय होइन् । झोले बनेर टोले नेता हुँदै संसदको फेटा बाँध्न पाइयो भने …? जाबो अन्न किन खाने ? सरकारी जग्गा जमिनमा महल बनाउने हो । प्राडो र पजेरोमा रमाउने हो । सुनका बिस्कुट खाएर ज्यान बनाउने हो ।

जालीभित्र साना माछा भुराभुरी पार्छु
खान्न अन्न सुन खाई भुँडी टन्न भर्छु ।

झोले संगठनको सदस्यता नलिएका साथीहरूलाई सदस्यता लिने सुझाव छ । झोले भएपछि झाम्टीखोलेको पनि जोहो हुन्छ । राजनीतिको बाटो सोझिन्छ । मालिकहरूको निगाहा भयो भने तालुमा आलु फल्न सक्छ । जि एम्, सि एम् , पि एम् को चिठ्ठा पर्न बेर लाग्दैन ।

झोलेवादको सम्बन्ध चाकरीवादसँग रहेको कुरा भुल्नु हुँदैन । सफलताको सिखरमा पुग्ने मार्गहरूमध्ये चाकरीवाद पनि एक हो । राजनीतिमा त यो अनिवार्य नै छ । यसै सन्दर्भमा भैरव अर्यालको याद आयो । उनले भनेका छन् –

चोरी चकारी नगरी चतुर्‍याइँ हुन्न
दंगा फसाद नगरे इज्जतै रहन्न
सोझा र सज्जन कवै नलिनु दलैमा
पार्टी चलाउनु सधैं छल ओै बलैमा ।

जिन्दगीमा अगाडि बढ्नु छ भने सत्ताको सिढी चड्नु छ भने झोलेवादलाई शिरोधार्य गर्दै चाकरीतिर लाग्नुहोस् । चम्चागिरीलाई मुख्य हतियारका रूपमा प्रयोग गर्नुहोस् । शक्तिको भक्तिमा लीन भएर प्रभुका पाउमा लम्पसार परेपछि कसो पार नलाग्ला र ? चोरी, चकारी, चतुर्‍याइँ, दंगा फसादको मसलाले झानेपछि छिटो छलाङ् मार्न सकिन्छ ।

दरबार हाइस्कुल खोल्दा जंगबहादुर राणाले भनेका थिए- “अरूका कुरा छोडिदेऊ आफ्ना छोराछोरीलाई अंग्रेजी पढाऊ । विचार भनेको यस्तो पो हुनुपर्छ । बेलैमा आफ्नो दुनो सोझाउनु पर्छ । झोला नबोकी, झोले नबनी उँचाइमा पुग्न सकिँदैन । बेलैमा झोले बनौँ । आफू बन्न आफ्नैलाई दबाउनु पर्छ । शत्रुको पाउ समाउनु पर्छ । गर्नु पर्नेलाई चाकरी गरौँ । चतुर्‍याइँका साथ चम्चागिरि गरौँ । देशमा झोलेतन्त्र आएको छ । झोलेवाद झाङ्गिएको छ । झोलेतन्त्रलाई संस्थागत गरौँ ।

यसका लागि निःसन्देह झोले बनौँ । झोले साथीहरूलाई सम्मान गरौँ । झोलेवादलाई प्रवर्द्धन गरौँ ।
अन्तिममा एकपटक सबैले आवाज बुलन्द गरौँ ।
झोलेतन्त्र
– जिन्दावाद ! जिन्दावाद !!
झोलेवाद
– जिन्दावाद ! जिन्दावाद !!
झोले झोले एक हौँ
– एक हौँ ! एक हौँ ।

०००
२०८१।०३।२८
रेसुङ्गा न पा -२ तम्घास, गुल्मी

Subscribe
Notify of
guest

2 Comments
Oldest
Newest Most Voted
Rehit Saiju
Rehit Saiju
2 years ago

गजब, उच्च स्तरीय 🙏🙏

ram prasad panthi
ram prasad panthi
2 years ago
Reply to  Rehit Saiju

धन्यवाद भाइ

Nepal Telecom ad
चैतकाे बाँदर

चैतकाे बाँदर

रामप्रसाद पन्थी
दशैंसँगै रित्तिएकाे मन

दशैंसँगै रित्तिएकाे मन

रामप्रसाद पन्थी
सातामा विदा सात दिन

सातामा विदा सात दिन

रामप्रसाद पन्थी
ढाेग दियाँ

ढाेग दियाँ

रामप्रसाद पन्थी
झिङ्गे दाउ

झिङ्गे दाउ

रामप्रसाद पन्थी
मोबाइलको ठाँडो

मोबाइलको ठाँडो

रामप्रसाद पन्थी
2
0
Would love your thoughts, please comment.x
()
x