नेपाली हास्यव्यङ्ग्य अनलाइन पत्रिका

निरङ्कुश भनी राजा फालिएथ्यो भने जब

किन थप्नु तिनै राजा-रजौटा पर्दथ्यो अझ ?

एउटै राजधानीले काम चल्थ्यो भने अझ

थपी नयाँनयाँ राजा किन हौसिन्छ मानिस ?

जति राजा भए त्यत्ति राजधानी हुने भए !

राजधानी भए जत्ति त्यति राज्य हुने भए !

राजै राजा हुने कस्तो अनौठो गणतन्त्र यो

निचोरी जनता बाँच्ने अनौठो लोकतन्त्र यो !

‘सार्वभौम भयो लोक,-गफमा सबथोक भो

मलामी बन्न निस्के झैँ परन्तु लाग्छ देशको !

ख्वाउँला कसरी मैले – मलामी यति धेर छन् ?

सम्मान कसरी होला- जहाँ स्वार्थ अनेक छन् ?

कोदोवारी त हो पुग्ने फटेङ्ग्रा जति उफ्रिऊन्

कहाँ छ सजिलो बाँच्न कमिला यत्रतत्र छन् !

बारीमा उफ्रिने त्यस्सै फटेङ्रो किन बन्नु झन्

खाने दाउ गरी बस्ने बाटा बीच तयार छन् !

फटेङ्ग्रा जोगिएलान् र भए पनि ठुला ठुला

सानै भएर के हुन्छन् कमिला अति जोशिला,

हेर्छु सङ्घर्षमा देख्छु- फटेङ्ग्रा हार्दछन् ठुला !

आपसी मेल राख्नेले जित्छन् युद्ध ठुला ठुला।

अहो ! विचित्रको खेला देखिएको छ वास्तव

म उस्तै हेरिराख्दैछु तिनैलाई छु बिस्मित

लाश बन्न हिडे जस्तै फटेङ्ग्रा हिड्दछन् यतै

मलामी बन्न निस्के झैँ कमिला छन् जताततै ।

पाल्पा