भूपू सांसदको वक-पत्र !
नीति हेरियो ! न नैतिकताको कुरा गरियो ! जे भनियो, जे गरियो ! छल कपटै गरियो ! न वरत्र हेरियो ! न परत्र सोचियो ! जे जस्तो गरियो आफ्नै लागि गरियो !
सांसद भएर ठिकै गरियो !
देश स्मार्ट बनाउने योजना फेल खाए पनि,
आफ्नै घरपरिवारलाई भने स्मार्ट बनाईयो !
बाहिर सुशासनका कुरा गरे पनि
भित्र भित्र आफैले पोको परियो !
धेरै नसकिए पनि !
केही करोडको सम्पत्ति जोडियो !
सांसद भएर ठिकै गरियो !
सरकारी जग्गा छोरीको नाउँमा दर्ता गरियो !
खाने पानीको योजना बेचेर
घडेरी पनि किनियो !
बरालिएको छोरालाई ठेकेदार बनाइयो !
मोज गरियो !
पैसा कमाइयो !
सांसद भएर ठिकै गरियो !
पैसा पेलेरै नेताको मन जितियो,
दलको माथिल्लै पद हात पारियो !
विकासको कागजी घोडा खुब कुदाइयो !
आफ्नै भकारी भरियो !
सांसद भएर राम्रै गरियो !
डाँडाका टुप्पामा भ्यु टावर बनाएर कीर्तिमान राखियो !
भ्रष्टाचारी र तस्करहरूसँगको,
मित्रताले सुनको लङ्का बनाईयो !
बिरोधीहरूलाई गुण्डा लगाएर,
तह लगाइयो !
रामराज्य खडा गरियो !
सांसद भएर ठिकै गरियो !
भोक, रोगले जनता मरे पनि,
कमिसन खान छोडिएन !
न नीति हेरियो !
न नैतिकताको कुरा गरियो !
जे भनियो, जे गरियो !
छल कपटै गरियो !
न वरत्र हेरियो !
न परत्र सोचियो !
जे जस्तो गरियो
आफ्नै लागि गरियो !
०००
हालः चाँदी बजार, धनकुटा