नेपाली हास्यव्यङ्ग्य अनलाइन पत्रिका

हावाको सास हावाको वास हावामै सुर्ताएँ
हावाकै पिठो हावाकै रोटी हावामै सेकाएँ ।
कहिलेकाहीँ हावाले मिठो सपना ल्याउँछ
कहिले भने हावाले हावा खाएर अस्ताउँछ ।

हावा त चल्यो कताको चल्यो कसले चलायो
मनमा हो कि तनमा चल्यो केके पो ढलायो
नौनीको रोटी पकाइदिन्छु भन्दथे ‘देवता’
भोका’को पेट मुसारिदिने अचम्मै ‘ममता’ ।

बालुवा भुटी बना’को फुल खान्छौ कि खाँदिनौ
हावाको तावा हावाको सेल मान्छौ कि मान्दिनौ
नमाने पनि हावाको जाँतो बेस्करी घुम्दैछ
जाँतोमा घुन पसेर केके घमन्ड फुट्दैछ ।

हावाको झिर हावाको खिर हावाको अचार
हावामा हावा बिलाएपछि के हुन्छ विचार ?
बादलमाथि च्याउको खेती हावामा चढेर
जानुछ टिप्न हुर्कियो होला हलक्क बढेर
हावाको गति नठान्नू सानो बल्दछ बिजुली
हावा हो भनी नहेप्नू तुच्छ उठ्दछ सुनामी ।

हावाको सही प्रयोग गरे बन्दछ बिजुली
केवल हावा उडाए मात्रै सकिन्छ बिजुली
बैरीको बिउ आगोको झिल्को नजर अन्दाज
पानीको भेल हावाको झोँका अशक्त नजाँच ।

उडाइ लान्छ घमन्ड पोका वेगिलो हावाले
उडाइ सक्यो दम्भका दाना तात्तातो हावाले
हावा हो भनी फुलेर बस्ने अल्छीका पोका हौ
दोषको भारी नबोक्ने तिमी आफैमा धोका हौ ।

कोरोना पनि हावा हो भन्थे मानिस मार्दियौ
नयाँ छ यो त हावा हो भन्थ्यौ बाजी नै मार्दियौ
अरूमा हावा देखेर बस्ने तिमी नै हावा हौ
हावाको वेग नचिन्ने तिमी आफैमा हावा हौ ।

हल्लन्न पात नचली हावा कसरी चल्यो यो
बाहिरबाट चल्यो कि हावा भित्रैको चल्यो यो
हल्लिन रुख नचली हावा कहाँबाट चलेछ
यो हावा चल्दा पुरानो हावा नमज्जा ढलेछ ।

बनाइहाल्नु हुँदैन होला हावामा महल
हावाको आयु नछामीकन बन्दैन सबल
पुरानो हावा कुहेर हो कि नयाँले जिस्क्यायो
हावाले हावा काटेर आयो हावाले बिच्क्यायो ।

पुरानो हावा पुराण भयो काम गर्छ गर्दैन
नवीन हावा भर्खरै आयो के गर्छ गर्दैन
हावामा हावा उडेर आयो हावाको सवाई
पुरानो हावा नवीन हावा हावाकै लडाइँ ।

देखिन्छ आज हावाको ध्वजा चहल पहल
टिक्दैन होला हावाको मियो हावाकै महल
यो नयाँ हावा बत्तेर आयो पुरानो उडायो
हावाले हावा उडाको हैन सातो पो उडायो ।

मानव हामी हावाको पछि लाग्ने कि नलाग्ने
हावाको मति कस्तो छ भनी छाम्ने कि नछाम्ने
गर्जेको सुन्दा हावाको गति बलियो लाग्दछ
कुदेको देख्दा हावाको मति उत्तौलो लाग्दछ ।

उदार हो कि उत्तौलो हावा परीक्षा गर्नुछ
हावा र हावा तुलना गरी परीक्षा गर्नुछ
लग्यो रे कान भनेको सुनी दौडनु हुँदैन
नछामीकान नबुझी ज्ञान हुत्तिनु हुँदैन ।

मानिस हामी चाहिन्छ हावा निश्वास फेर्नलाई
सुनौलो हावा चाहिन्छ दिगो विश्वास गर्नलाई
हावा र हुरी उडेका बेला पतिङ्गर उडाउँछ
भुमरीभित्र परेर कतै मानिस हराउँछ ।

पहिला पनि चलेथ्यो हावा हुन्डरी गरेर
संसार जित्छु दुनियाँ रच्छु रौनक भरेर
त्यो हावा आज सेलाई गयो हावा नै भएर
यो हावा हेर्छ दङ्दास पर्छ हावा नै बनेर ।

बेलुन भिन्न भए नि हावा उही पो होला कि
सिसी त नयाँ पुरानो रक्सी जस्तो पो होला कि
प्रगति बोक्ने सुधीर हावा अपेक्षा गर्दछौँ
कल्याणकारी विश्वास दिने हावा चैँ चाहन्छौँ ।

फुटेर जाने पानीका फोका पौडनु हुँदैन
लग्यो रे कान भनेको सुनी दौडनु हुँदैन
हावाले धर्ती छुएर आओस् स्वागत गरौँला
पुरानो नयाँ तुलना गर्दै मुस्कान छरौँला ।

हावाको गति हावाको मति विचार गर्नुछ
हावाको कर्म हावाको मर्म परीक्षा लिनुछ
सपनाभरि बिपनाभरि हावाको चर्चा छ
आकाश धर्ती हावाकै फूर्ति हावाकै पर्चा छ ।

संसारभरि धेरै नै चले हावाको हुलिया
तिनले भोलि बदल्ने हुन् कि आजको हुलिया
हावामा हावा उडेर आयो हावामा मिसियो
हावाले हावा स्वागत गर्यो हावामा टाँसियो ।

उहिलेदेखि चलेको हावा हेरेको हेर्‍यै छौँ
हावामा चारा आउँछ भनी घेरेको घेर्‍यै छौँ
सुवास बोक्ने प्रशान्त हावा अपेक्षा गर्दछौँ
निराश पार्ने नौटङ्की हावा उपेक्षा गर्दछौँ ।

हावामा हावा मिलेछ अब के हुन्छ हेरौँ न
पुरानो हावा वहन्छ कता त्यो पनि हेरौँ न
कोरोना बोक्यो हावाले कति मानिस सखाप
अमृत बोक्ने हावाको सास सधैँ नै अभाव ।

कहिलेकाहीँ हावाले मिठो सपना ल्याउँछ
कहिले भने हावाले हावा खाएर अस्ताउँछ ।

०००
नलाङ, धादिङ
हाल- कीर्तिपुर