नेपाली हास्यव्यङ्ग्य अनलाइन पत्रिका

अड्डा अदालतहरू किन चाहिए र
नेताहरूसित मिले डर के भयो र
जस्तै कुकर्म गर रत्ति डरै नमान
पार्टी कुनैसित मिले बचिनेछ जान ॥

पैसा कुरुस्त छ भने अलि बाँड चन्दा
आउन्न सामु कहिल्यै पनि ऐन फन्दा
केही करोड दिइए भवनै पुगिन्छ
राम्रो छ सांसद भनी सबले चिनिन्छ ॥

कुर्सी फुटाल सुरयन्त्र लिएर भाँच
रक्सी पिएर गर ताण्डव खूब नाच
मन्त्री हुने छ सजिलो यति नै उपाय
खोलै समान धनको अनि हुन्छ आय ॥

जे बेच्न लाग्छ मन मोल लिएर बेच
खोला कि वा बगर शैल कि धातु बेच
आमा दिदी र बहिनी परिवार बेच
जोद्धा बलिष्ठ भुज पाउ दिमाग बेच ॥

मर्ने लुरे मरिरहून् किन गर्नु चिन्ता
के नाम भो मुलुकको किन राख्नु लण्ठा
आफै मजा गर यहाँ नभए विदेश
भागी गई बस भनेर उही स्वदेश ॥

०००
काठमाडौं