नेपाली हास्यव्यङ्ग्य अनलाइन पत्रिका

रमेश खकुरेल :

गए गीतका ती मजाका जमाना
समस्या परेको छ खाना र नाना
नआओ यता मित्र बोकी तराना
परै राख गाना र तिम्रा बजाना ।।

उडेको छ छानो ठिहीले सतायो
भकारी छ खाली झनै भोक लाग्यो
न ता दाउरा छन् बस्यो ग्याँस रित्तो
भरे भोलि खस्ला कि जस्तो छ भित्तो।।

बढेको बढ्यै भो रिनैको भकारी
सधैँ साहु खेद्दै हिँडेका पछाडि
नभागूँ हिँडी सक्नु सामर्थ्य छैन
कुनै ठाउँ छैनन् जहाँ मिल्छ चैन ।।

परेको छ यस्तो बबालै बबाल
फकाएर छुट्टी छ छोरी दलाल
कुनै लान्छु भन्दैछ आजै मलाया
जहाँ मिल्छ खाना तराना र मायाँ ।।

सुनाऊँ कहाँ जो छ लाचार देख्छु
सबै स्वार्थकै दास आचार देख्छु
यता हेर्छु राजा उतै देख्छु राजा
सबैको उही स्वार्थकै लाम ताजा ।।

पुगूँ शम्भुको द्वार पस्नै दिँदैनन्
यतैबाट हेरूँ उनी देखिँदैनन्
बसेको छ साँढे यतापट्टि छेकी
गयो जिन्दगी न्याय देख्तै नदेखी ।।

०००
काठमाडाैं