नेपाली हास्यव्यङ्ग्य अनलाइन पत्रिका

डिल्लीप्रसाद मुलतिहुन :

श्रीगणेश पुकारेर सबैका सामु पर्दछु
सुल्टो कर्म सबै भुल्छु उल्टो सम्पूर्ण गर्दछु ।१।

अधर्म च्याप्प च्यापेर धर्मको गीत गाउँछु
असत्य नै उचालेर टाकुरोमा पुर्‍याउँछु ।२।

अयोग्य छु त्यसैले म पार्टी तुरुन्त खोल्दछु
अयोग्य हुन् अरू  भन्दै बाठो भएर बोल्दछु ।३।

यो मेरो घोषणा पत्र सबैले पढ्नुपर्दछ
मैले गर्न नजानेको समेत काम गर्दछ ।४।

अचम्मका यसैभित्र खोजियो गफ लाउन
मीठा शब्द थुपारेको आफ्नै दुनो उठाउन ।५।

नसुनेका नदेखेका काम हुँदैछ घोषणा
दुः ख पर्ने कुरा बेग्लै हुँदै हुँदैन शोषण ।६।

देशबासीहरू रोए यो पढेर रमाउछन्
सुल्टो गर्नेहरूले नै उल्टो बाटो समाउँछन् ।७।

म जस्ता चतुरा मान्छे रुनेलाई फकाउन
घोषणापत्र बोकेर थाल्नेछन् घर धाउन ।८।

हत्या हिंसा सबै रोक्ने घोषणापत्र लेखियो
भ्रष्टाचार भगाएर रोप्छौँ छातीतिरै सियो ।९।

छर्लङ्ग देखिए भ्रष्ट म सक्नेछु लुकाउन
दायाँबायाँ गरे मैले पाइँदैन समाउन ।१०।

०००
ओखलढुङ्गा, हाल भक्तपुर