नेपाली हास्यव्यङ्ग्य अनलाइन पत्रिका

घनश्याम रेग्मी :

यात्रा थियो हिजोको गन्तव्य पन्थ पूर्व
गाडी चढी हिँडेको संयोग यो अपूर्व
घन्टा दुई हिँडेमा पुग्ने थलो थियो सो
सम्पूर्ण रात्रि हिँड्दा थाकेर देह गल्दो ।१

ठेक्का थियो नयाँ त्यो बाटो नयाँ खनेको
बाटो तयार के होस् माटो नयाँ छरेको
कैयौं हजार गाडी दौडे धुलो उडाए
रातै परे समानै गन्तव्य नै हराए ।२

चौतर्फ गुम्म हेर्दा पार्दै धरा अँध्यारो
साह्रै धुलो उडेको हिँड्नै अतीव गाह्रो
जानू कता कता खै देखिन्न एक रत्ति
केही ढिलो गरेमा बच्दैन देह कत्ति ।३

पानी परेन थोपो धर्ती सुका सुका छ
हाम्रो शरीर हेर्दा छैनन् कि झैँ लुगा छ
माटो जमेन फुक्का बुर् बुर् धुलो उडेको
पन्छी समेत उड्ने मेलो नभै रुकेको ।४

०००
हाल नेपालगञ्ज