नेपाली हास्यव्यङ्ग्य अनलाइन पत्रिका

रमेश खकुरेल 

हेर्छन् उतातिर फिरी शिर माथि लाई
चश्मा छ नेत्रभरि टम्म सबै लुकाई
केही बुझिन्न मनभित्र कुरा कसो छ
अन्दाज चाहिं छ अवश्य यसोउसो छ ॥

सोझै त छैन तर दृष्टि कुना यता छ
बोल्ने त हैन तर देख्छु जुँघा उचाल्छ
बोल्यो भने पद समान हुँदैन झैं छ
इच्छा कतै छ नभनी पनि हुन्न झैं छ ॥

हामी बरा पदहरूसित मित्रता ली
लेख्छौं छ जे तथ कतै कटुता नपाली
आनन्द लेख्नु छ यही सुखमा रहन्छौँ
साथी भए पनि सुखी नभए रुँदैनौँ ॥

ती चाहिँ आज बुझियो अलि आश राख्छन्
हामी उतैतिर मिलौँ कि भनेर खोज्छन्
जे गर्दछन् असल लेखिदिऔँ कि ठान्छन्
मागौँ उनीसित र पेट भरौँ कि मान्छन् ॥

“ई” को अरे युग सबैतिर फैलिएको
यो चाकरी यदि गरे गुण चम्किएको
“ई” चाकरी सब गरून् यति खोज्दछन् रे
ईः चाकरी ! कलमचालक भन्दछन् रे ॥

०००
काठमाडौं