नेपाली हास्यव्यङ्ग्य अनलाइन पत्रिका

गोपीचन्द्र कार्की :

म पञ्चशील मान्ने
म बुद्धको मन्त्र जप्ने
कसैको दासता नस्वीकार्ने
आफ्नै माटोसँग मुटु जोड्ने
म स्वतन्त्र शान्तिप्रेमी
आफनै धुकधुकीमा रमाउने ।
फेर्न नसकिने त्यो छिमेकी
घेरिएको छ तीनतिर
आली मिच्छ, साँध चोर्छ
बेलाबेला घुक्र्याउँछ
अर्ति उपदेश दिन्छ
कहिले बाटो छेक्छ
अन्नपानी रोकिदिन्छ
कहिले पानी खोलिदिन्छ
डुवाएरै मार्न खोज्छ
हेपाहा त्यो छिमेकी ।
त्यो छिमेकी अहिले
हाम्रै पुर्खाले आर्जेको
लिपुलेक र लिम्पियाधुरातिर
उसको गिद्धे नजर परेको छ
हाम्रै नावीमा ऊ गजधम्व बसेको छ
गुन्जी र कुटीमा ऊ परेड खेल्छ ।
फेर्न नसकिने त्यो छिमेकी
मुखले मित्रताको बखान गर्छ
पाखुरा सुर्कंदै, सधैं हेप्ने गर्छ,
फेर्न नसकिने त्यो छिमेकी ।

०००
तीनथाना, काठमाडौं