नेपाली हास्यव्यङ्ग्य अनलाइन पत्रिका

गोपीचन्द्र कार्की :

पैसा कमाउनेको इज्जत हुन्छ
कमाउन नजान्ने हुतिहारा बन्छ
नेपालीलाई शरणार्थी बनाऊँ
जसरी हुन्छ पैसा कमाऊँ ।

परीक्षार्थीको कापीमा नम्बर थपेर
फेल भएकालाई पास गराएर
आफ्नै हात जगन्नाथ बनाऊँ
जसरी हुन्छ पैसा कमाऊँ ।

खाल्डो खनौँ, फेरि खाल्डो पुरौँ
लाइसेन्स अब घरघरमा पुर्‍याऊँ
फेल भएकालाई पास गराऊँ
जसरी हुन्छ पैसा कमाऊँ ।

भन्सार मिलाऊँ सुनको खेती गरौँ
यो काम चाहिँ ठुला नेतामा पारौँ
तीनपुस्तालाई टन्न पुर्‍याऊँ
जसरी हुन्छ पैसा कमाऊँ ।

हाकिम मिलौँ कारिन्दा मिलौँ
मिलिभगतको संस्कार बसालौँ
सरकारी ढुकुटी स्वाहा बनाऊँ
जसरी हुन्छ पैसा कमाऊँ ।

अनागरिकलाई नागरिक बनाऊँ
नागरिकलाई अनागरिक बनाऊँ
भोलि के हुन्छ कसरी थाहा पाऊँ
जसरी हुन्छ पैसा कमाऊँ ।

तलदेखि माथिसम्मै करेली कसाैँ
सरकारी जग्गा स्वाहा पारौँ
भागशान्ती बाँडिचुँडी खाऊँ
जसरी हुन्छ पैसा कमाऊँ ।

०००
तीनथाना, काठमाडौं