नेपाली हास्यव्यङ्ग्य अनलाइन पत्रिका

गोपीचन्द्र कार्की :

काण्डै काण्डमा मुछिनु भएको छैन
विवादै विवादमा झेलिनु भएको छैन
अरवौं हसुरेर न करोड चढाउनु भयो
तैपनि तपाईं कसरी मन्त्री हुनु भयो ?

जेल, कालकोठरी भोग्नु भएकै छैन
ठेक्काको रकम जग्गामा हाल्नु भएकै छैन
हत्या, अपहरण, न जिउँदै जलाउनु भयो
तैपनि तपाई‌ं कसरी मन्त्री हुनु भयो ?

धम्की, फिरौती, गुण्डागर्दी गरेकै छैन
मानव बेचविखन, हतियार केही छैन
विचौलिया माफिया, तस्कर न साथी भयो
तैपनि तपाईं कसरी मन्त्री हुनु भयो ?

दिउँसै कर्मचारी थुन्ने कुट्ने गरेकै छैन
ठर्रा खाएर दिँउसै हल्लिनु भएकै छैन
अर्वौँ कुम्ल्याएर न करोडमा छुट्नु भयो
तैपनि तपाइँ कसरी मन्त्री हुनु भयो ?

सहयोगीसँग लहसिनु भएकै छैन
परस्त्रीका पछि पछि लाग्नु भएकै छैन
गाह्रो चढेर न झ्यालबाट छिर्नु भयो
तैपनि तपाईं कसरी मन्त्री हुनु भयो ?

छेपारो बन्न खोइ जान्नु भएकै छैन
चाकरी चुपलुसी योग्यता पुगेकै छैन
गुट, उपगुट, खोइ बनाउनु भयो
तैपनि तपाईं मन्त्री कसरी बन्नु भयो ?

०००
तीनथाना, काठमाडौं