नेपाली हास्यव्यङ्ग्य अनलाइन पत्रिका

इन्दिरा चापागाईं :

बुझ्नु भो ? महाशय !
म मन्त्री बन्न योग्य छु
कसरी ?
मसँग सूनलाई लसुन बनाउँने कला छ
अरुको अपमान र आफ्नो गुणगान गाउँने गला छ
महिला हिंसामा लिप्त छु
भ्रष्टाचारमा पनि पोख्त छु
आफ्नो देश लुट्न जति पनि सक्छु
कार्यकर्ताको बुध्दि भुट्न जति पनि खट्छु
यति मात्र होइन
मसँग सहकारी डुबाउँने सीप छ
पार्टीको मूलमन्त्र, यस्तै यस्तै ह्वीप छ
नागरिकलाई शरणार्थी बनाउँने तागत छ
मान्छे वेपत्ता बनाउँनेसँग मिलीभगत छ
थुप्रै दिदी वैनीलाई नाङ्गै नचाउँन छु
इटा भट्टामा मजदुरलाई जिउँदै जलाउँन सक्छु
यति मात्र कहाँ हो र,
हेर्नुस् त, गुण्डागर्दी गर्ने मसल छ
नैतिकता किनबेच गर्ने पसल छ
नागरिकता खरिदबिक्री गर्ने क्षमता छ
एबीसी कार्यान्वयन गर्ने सक्षमता छ
के फलाक्दै छ भनेर छक्क पर्नु भाछ ?
यो मेरो मन्त्री हुने योग्यता हो
यति भएपछि त सरकारमा जाने पक्का छ ।
(एबीसी भन्नाले आफ्नो मान्छे, भनसुन, चाकरी)

०००
सूर्यविनायक न.पा. ५, भक्तपुर ।