नेपाली हास्यव्यङ्ग्य अनलाइन पत्रिका

विनाेद सुवेदी :

देश सकिन लागिसक्यो
देश बनाउन आओ
देश बचाउन आओ
मातृभूमी कलिङ यु !

हुन्छ म आँउछु
फुर्सद छैन अहिले देश सोच्न
यता आउँदाको रिन छ थाप्लोमा
त्यो रिन सबै तिर्न सक्ने भएर आउँछु
दुइ चार लाख पोल्टामा बाेकेर
गलामा र नाडीमा
भिरेर आउँछु ।
मातृभूमी कलिङ यु !

आउँछु म आउँछु
आफ्नी आमाको लाम्टाले नपुगेर
विदेशी बाको घुँडा चुस्न हिँडेको म
कहाँ त्यत्तिकै आउँछु !
ज्यानमा तागत खस्केपछि आउँछु
बाको घुँडा खुस्केपछि आउँछु !
मातृभूमी कलिङ यु !

हुन्छ म पक्कै आँउछु
अन्तिममा आउने त्यही त हो
अझै त बल बाँकीनै छ शरीरमा
बल सक्किएपछि आउँछु
शरीरकाे हाडखोड मक्किएपछि आउँछु
मातृभूमी कलिङ यु !

देशले कहाँ नदिएको हो र
हुर्काइ, बडाइ, अनि पडाई
देशकै त देन हो नि !
त्यो सबै लात हानेर हिँडेको म
कहाँ त्यत्तिकै आउँछु
शरीरका सबै अङ्गअङ्गले
साथ छोडेपछि आउँछु
काम गर्ने जाँगर र शरीरको आँत
मरेपछि आउँछु ।

चाहिने जति बलबुद्धि,
सिङ्गो ज्यान, सग्ला हातगोडा
टमक्क मिलेका दाँत्,
चिटिक्क परेको मुख मोहडा
सबै देशकै त देन हो नि !
आउँछु म साँच्ची आउँछु
देशको लागि केहि गर्न नसके पनि,
मातृभूमीमा अँगाल्लिन नि !
आस बोकेर आउँछु
कि थर्थराउदै लास बन्न,
कि त लास बनेर आउँछु ।

०००
क्यानडा