नेपाली हास्यव्यङ्ग्य अनलाइन पत्रिका

मिठो खाने
राम्रो लाउने सपना उनेर
सहर पसेको मेरो अल्लारे छोरो
सुन्छु आजभोलि
जाँडरक्सी चरेसगाँजा धुत्छ
सडकमै बस्छ सडकमै सुत्छ
मनाही लेखेको ठाउँमा
लाज नमानी मुत्छ
बिन्ती छ पठाइदिनु है
मेरो छोरालाई नाइट बसमा हालेर
उसको चिन्ताले यहाँ
आमाको मन कति दुख्छ ।

पढ्ने लेख्ने भनी सपना उनेर
सहर पसेको मेरो छोरो
सुन्छु हिजोआज
नेताको लहलहैमा लागेर
पार्टीको झन्डा बोक्दै
इँटा ढुङ्गाहरू ठोक्दै
कहिल नेपाल बन्द गर्दै
कहिले सडक बन्द गर्दै पुलिससँग जुध्छ
लाठीचार्ज हुँदा गल्ली गल्ली कुद्छ
बिन्ती छ
पठाइदिनु है मेरो छोरालाई
माइक्रो बसमा हालेर
गरेपछि एक छाक
घरमै खान लाउन पुग्छ
चिन्ताले ननिदाई मन
रात रातभर रुँग्छ ।

नायक बन्ने सपना पाल्दै
सहर छिरेको मेरो छोरो
सुनिन्छ आजकल खलनायक भएर
मान्छेको पैसा थुत्छ
र पुलिस ठाना पुग्छ
रातभर हल्ला गर्दै भुक्छ
दिनभर उल्लुझैं लुक्छ
बिन्ती छ पठाइदिनु है
मेरो छोरालाई दिवा बसमा हालेर
आमाको तन यहाँ
चिन्ताले झन सुक्छ ।

जागिर खाने सपना हालेर
सहर हिँडेको छोरो
सुन्छु आजभोलि
नालायक भएर
चोरीको बाइक चढ्दै
महिलाको गहना लुट्छ
अपहरण गर्नलाई
उसको ठुलै एउटा गुट छ
सुन्छु मान्छेलाई लुट्न
दिन दहाडै बाटो ढुक्छ
बिन्ती छ पठाइदिनु है
मिनी बसमा हालेर
अझै उसलाई पाल्न सक्ने
मेरो सामर्थ्य खुद छ ।

सुनिन्छ हरेक दिन
रेडियो पनि
उसकै बदनाम फुक्छ
सुन्दा यो गाउँघर पनि
उसलाई झन थुक्छ
बिन्ती छ फर्काइदिनु है छोरालाई
आजभोलि चिन्ताले मुटु पनि दुख्छ ।

दाङ, हाल काठमाडौं