कहिले हुन्छ सरकार ?
तिमी छौ, भन्ने भान कहिले हुन्छ सरकार ?
खाडी उड्ने रित्तो उडान कहिले हुन्छ सरकार ?
राहदानी फाल्दिँदैमा शासक बनिन्छ र !
नागरिकको सच्चा प्रमाण कहिले हुन्छ सरकार ?
गोर्खे र बहादुर भै कति झुक्नु सधैं
हाम्रो देशमा श्रम गुणगान कहिले हुन्छ सरकार ?
चाटु,चम्चे राडीमा छन् युवा खाडीमा छन्
नातावादको समाधान कहिले हुन्छ सरकार ?
रगतका प्यासीहरू फेरि युद्ध भन्छन्
बन्दुकभन्दा कलम महान कहिले हुन्छ सरकार ?
के गर्नु त्यो संबिधानले धानै नफले’सी !
हिउँद बर्षा मल प्रदान कहिले हुन्छ सरकार ?
सुनको भाउ जहाँ पुगोस् नुनको खबर के छ ?
झुपडीको स्तर उठान कहिले हुन्छ सरकार ?
हाम्रा पनि आमा–बाबु, जहान–बच्चा छन् नि !
एउटै चुल्हो, एउटै सिरान कहिले हुन्छ सरकार ?