नेपाली हास्यव्यङ्ग्य अनलाइन पत्रिका

के ठानेर हो कुन्नी ?
आफ्नो निजी निवासको गोप्य कोठामा बोलाएर
पशुपतिनाथले भेटीघाटीको हिसाब राखिदिने मानिस खोज्न पठाए ।
कुन स्वार्थमा हो कुन्नी ?
एक प्रतिष्ठित एनजिओले
पुराना कपडा पहिरिएर रुन लगायो ।
र, फोटो खिचेर लग्यो ।
कसले सुन्न चाहेछ कुन्नी पुराण ?
पण्डितजी गेस्टहाउसको रंगिन कोठाभित्र छिरे ।
र, ढोकामा चुक्कुल लगाए ।
बीच सडकमै अस्मिता लुटिएर रुँदै गरेकी युवतीलाई
कति हप्कायो होला पुलिसले ?
शान्ति सुव्यवस्था बिथोलेको भन्दै !
सधैं हतारमा देखिने ती यात्रीले
दशकौं पहिलेदेखिको यात्रा गरिसकेपछि पनि
अझै किन गर्दै छन् कतै पनि नपुगिने यात्रा ?
महंगो शुल्क तिरेर मास्टर्स पढ्दै गरेको
ट्यालेन्ट युवाले कतिपटक बिसिर्यो होला देशको नाम ?
र, सर्च गर्यो होला गुगलमा ?
यी सबै प्रश्नहरूको उत्तर खोज्दै हिँडेको सपनालाई
कति वर्ष पहिले लखेट्यो होला देशले ?
देशबाट !
म भने,
इतिहासको भग्नावशेषभित्र
सपनाको त्यही
तस्विर खोजीरहेछु ….।

हत्पते–७, सिन्धुली