नेपाली हास्यव्यङ्ग्य अनलाइन पत्रिका

ए देश ! मेरो परिवेश कता हरायो ?
एउटै हिमाल पहाड मधेश कता हरायो ?

स्वयम्भु लुम्बिनी र बौद्ध सबै त्यहीँ छन्
त्यतै बुद्धको थियो सन्देश कता हरायो ?

पुतलीको रङ्ग उस्तै, उस्तै छ फूल बगैंचा
यी तिन बिचको त्यो भावावेश कता हरायो ?

कस्तो हुरी यो आयो, ओहो के के उडायो ?
सप्पै रङ्गका चङ्गा उड्ने आकाश कता हरायो ?

हिमाल त्यसैगरी हाँस्दै छ जसरी हाँस्थ्यो पहिले
त्यसको हाँसोले ल्याउने ममता कता हरायो ?

माटो उस्तै छ, उस्तै छन् खेत बारी र पाखा पखेरू
यिनमा उम्रने प्रेम–लहरीको उल्लास कता हरायो ?
ए देश ! मेरो परिवेश कता हरायो ?

सप्पै जना आफ्नै लाग्थे, सप्पै ठाउँ आफ्नै लाग्थ्यो
आफ्नै घर आँगन पनि बिरानु लाग्न थाल्यो,

मेरो घर–गाउँ कता हरायो ?
ए देश ! मेरो परिवेश कता हरायो ?

बत्तिसपुतली, काठमाडौं