नेपाली हास्यव्यङ्ग्य अनलाइन पत्रिका

डा. बमबहादुर थापा जिताली :

नेपाली ममचा बने दिनदिनै, देखिन्छ चारैतिर
नेपाली जन सेकुवासरि भए गुच्चा बनेझैँ शिर ।
यस्तो हालतमा छ जीवन भने सत्ता सधैँ उर्वर
बन्ने लक्षण देखिएन जनता ! गोही बनी सुन्दर !!

नेपाली विचरा ! भएर मुरली ढाडे भए टाउके
नाता–लम्पट छन् भकुर्न जनता स्वार्थी बने लाउके ।
खाता जाँच भएन यो बखतमा बढ्दै गयो अन्तर
माटो छैन विकासमा चहकिने गोही बनी सुन्दर !!

नोटैनोट पिएर यो समयमा भाले भकारी भए
भोटैभोट लिएर मालिक भए आफैँ डकारी रहे ।
यस्तो चाल चलाउने चलनमा साँढे भए आतुर
मालामाल हुने र देश दुहुने गोही बनी सुन्दर !!

हाम्रो राष्ट्र हराभरा रहरिलो वैकुण्ठजस्तै थियो
पुर्खाको गरिमा प्रसिद्ध महिमा खाए चपाए फियो ।
मौलाएर दरिद्रता प्रतिदिनै पाठा पठाए पर
डाकी दुर्दिन, राष्ट्रको शिखरमा गोही बनी सुन्दर !!

भोका छन् जनता भनी अलिकता मान्दैन कोही डर
नेपाली गरिमा गिराउन उठे ! काला र राता घर ।
कोहीका घर छन् विशाल चुचुर कोही रूने धर्धर
यस्तो तीब्र विभेदले गति लियो, गोही बनी सुन्दर !!

नेपाली ढुकुटी सके सलहले दायाँ र बायाँ गरी
बाटो एक अनेक रूप गतिमा बढ्दै गयो तस्करी ।
सानाले सुख, शान्तिसाथ जिउने बाटा बने जर्जर
ऐले देश गयो विचित्र गतिमा गोही बनी सुन्दर !!

०००
काठमाडौं