नेपाली हास्यव्यङ्ग्य अनलाइन पत्रिका

डा. बमबहादुर थापा जिताली :

चलाए लुटको धन्दा बनाए जन निर्धन
हुर्काए झुटको खेती सर्वहारा भनीकन ।
चुसेर जनतालाई हरिकङ्गाल पार्दछन्‌
नीतिशास्त्र चपाएर आफू मात्र डकार्दछन् ॥

छोराछोरी लगी पारि उच्च शिक्षा पढाउँछन्‌
अर्कालाई बरालेर क्रान्ति गर्न पठाउँछन् ।
भनियो बुर्जुवा शिक्षा, दीक्षा बन्दुक लादियो
आफू मात्र भुँडी भर्ने नीतिलाई सकारियो ॥

को बुझ्‌ने घिचुवा चाला ? मालामाल हुँदै गए
नबुझ्‌ने दुनिया आज गोता खाँदै रुने भए ।
निर्धालाई हकारेर बलियाले खँगार्दछन्‌
गाई मार्न सिकाएर चितुवा अघि सार्दछन् ॥

पौरखी पाखुरा छैनन् बाँझो खेत छ उर्वर
परदेशी भए हात, भयो स्वदेश जर्जर ।
अर्कालाई सपारेर बिगार्ने नीति भित्रियो
यही नीति सकारेर देशको स्थिति बिग्रियो ॥

खानका निम्ति खाएर डामाडोल छ देशमा
तोरी, मकै मढारेर भद्रगोल मधेसमा ।
म फुक्छु युगको शङ्ख को सक्ने देश बिर्सन ?
यस्तो हालतमा मीठो सक्छ को गीत सिर्जन ??

०००
काठमाडाैं