नेपाली हास्यव्यङ्ग्य अनलाइन पत्रिका

सुन्यौ नि तिमीले मेरी आमा,
दाइले त गोत्र फेर्यो अरे
भाइले नि छिट्टै फेर्दै छ रे,
तिमीले दिएको नाम त यिनले
छाड्छन् कि कसो ?
फेरेको गोत्रको पहिचान खोज्ने अरे ।

अंशवण्डा पनि पो लगाउँदै छन् रे
लेकको बारी र वेँसीको गरोले मात्र पुग्दैन रे
तिमीलाई पनि पो चिरेर बाँड्ने अरे
तिम्रा दाहिने स्तनमा दाइले
उसको गोत्रको झण्डा गाड्छ अरे
देब्रे स्तन त भाइले
तिम्रा शरीरबाटै पो अलग्याउँछु भन्दै छ रे !

तिम्रो लट्टा परेको कपाल पनि भाग लगाए रे
आफ्नो आफ्नो भागको सक्दो लुछ्ने अरे
आमा बिर्सेर पनि
टाउको दुख्यो चाहिँ नभन ल
तिम्रो उपचार खर्च भाग लगाएको छैन
उपचार गर्न परे छिमेकी दाइ आउँछ अरे
आफ्नो ओठ रसिलो पारेपछि
अलिकति खर्च दिन्छ अरे
फेरि त्यो खर्च चाहिँ दाजभाइले
बाँड्ने अरे !

भाउजू बुहारीको माइतीबाट
टिकट आको छ रे
त्यो टिकटमा बहिनीलाई
बम्बई लाने अरे
अनि बहिनीको
पीडा रुवाइको सङ्गीतमा
भाउजूले राष्ट्रगान लेख्ने अरे
बुहारीले नारी–गीत गाउने अरे
अनि पो बल्ल तिमी
स्वतन्त्र सार्वभौम नेपाल हुन्छ्यौ अरे
तिमीमा त ठूलो परिवर्तन ल्याउने अरे
आमा, तिमीलाई त नयाँ नेपाल बनाउने अरे ।
कपन, काठमाडौं