नेपाली हास्यव्यङ्ग्य अनलाइन पत्रिका

चौबिस–चौबिस घण्टामा–
नाथे बार घण्टा बत्ती नहुँदैमा अन्धकार भयो रे !
झूठ, हुनै सक्दैन !

हप्तैपिच्छे पानी बाँडिएको छ
मात्र छ दिन नआउँदैमा हाहाकार भयो रे !
मिथ्या, हुनै सक्दैन !

बार–बार महिनामा–
यसो एकदुई महिना ग्याँस नपाउँदैमा अतिसार भयो रे !
ब्यर्थ, हुनै सक्दैन !

एउटामात्र देश भनम् त चोखो !
दुईचार करोड खुद्रे भ्रष्टाचार हुँदैमा अत्याचार भयो रे !
अनर्थ, हुनै सक्दैन !

भाऊ नबढे नाफा कसरी होला ?
यसमा पनि गाली गर्छन्, भाउबृध्दि तारम्तार भयो रे !
सनकी, हुनै सक्दैन ।

प्रजातन्त्र बुझेकै छैनन् लाछी जनताले–
कुर्सी तानातान भयो रे ! हानाहान पनि भयो रे !
हुन्छ त ? हुन सक्दैन !

यो साँच्चै लबस्तराहरूकै देश हो ।
छि लाजमर्नु ! यस्ता नाथे देशको नेता पनि के हुनु !
इज्जत ? हुनै सक्दैन ।
२०७१ माघ
काठमाडौ